കാലടി: മോഷണംപോയ വാഹനം മണിക്കൂറുകൾക്കകം കണ്ടെടുത്ത് മോഷ്ടാവിനെയും പിടികൂടി കാലടി പൊലീസ്. ഇടുക്കി കുഞ്ചിത്തണ്ണി തോക്കുപാറ പുളിക്കൽ വീട്ടിൽ നിസാറാണ് (37) അറസ്റ്റിലായത്. ചെങ്ങൽ വട്ടത്തറ ജംഗ്ഷനിലെ സ്ഥാപനത്തിൽ നിന്നാണ് പുലർച്ചെ മിനിവാനുമായി മോഷ്ടാവ് കടന്നുകളഞ്ഞത്. വാഹനം മോഷ്ടിക്കുന്നതിന്റെ ദൃശ്യം സി.സി ടിവിയിൽ നിന്നുകിട്ടി. ഇതുവച്ച് പ്രത്യേക ടീംരൂപീകരിച്ച് ജില്ലയാകെ അന്വേഷണം വ്യാപിപ്പിച്ചു. സ്റ്റേഷനുകളിലേക്ക് സന്ദേശമയച്ചു. അന്വേഷണത്തിനിടയിൽ മോഷ്ടാവിനെ പെരുമ്പാവൂരിൽ കണ്ടെത്തി. രക്ഷപെടാൻ ശ്രമിച്ച പ്രതിയെ പൊലീസ് പിന്തുടർന്ന് പിടികൂടുകയായിരുന്നു. വാഹനം ബോയ്സ്കൂൾ ഗ്രൗണ്ടിന് സമീപം ഒളിപ്പിച്ച നിലയിലായിരുന്നു. എസ്.എച്ച്.ഒ ബി. സന്തോഷ്, എസ്.ഐമാരായ ടി.ബി. ബിബിൻ, പോളി, എ.എസ്.ഐ അബ്ദുൾ സത്താർ എസ്.സി.പി.ഒമാരായ മനോജ്, അനിൽകുമാർ, ഇഗ്നേഷ്യസ് തുടങ്ങിയവരാണ് അന്വേഷണസംഘത്തിലുള്ളത്.