കോതമംഗലം: കൊവിഡ് പ്രതിസന്ധികൾക്ക് ഇടയിൽ ടൂറിസത്തിനു പ്രതീക്ഷയേകി ഭൂതത്താൻകെട്ട് സജീവമാകുമ്പോൾ ഇവിടത്തെ പ്രധാന ആകർഷണമായ വാച്ച് ടവർ തുറന്നുനൽകാതെ അധികൃതർ. ഇവിടെയെത്തുന്ന ഏതൊരു സഞ്ചാരിക്കും ഏറ്റവും ഇഷ്ടപ്പെട്ട ഇടമാണ് വാച്ച് ടവർ. ഡാമിന്റെ സൗന്ദര്യവും പെരിയാറിന്റെ വിദൂരദൃശ്യങ്ങളും ആസ്വദിക്കുന്നതിനായി പണികഴിപ്പിച്ചിട്ടുള്ളതാണ് വാച്ച് ടവർ. പെരിയാർവാലിക്കാണ് സംരക്ഷണ ചുമതലയും മേൽനോട്ടവും.

കൊവിഡ് രണ്ടാം തരംഗത്തിനുശേഷം ഇതേവരെ വാച്ച്ടവർ തുറന്നുകൊടുക്കാനുള്ള യാതൊരുവിധ നടപടിയും അധികൃതരുടെ ഭാഗത്തുനിന്നുണ്ടായിട്ടില്ല. അറ്റകുറ്റപ്പണിയുടെ പേരിലാണ് വാച്ച്ടവർ അടച്ചതെങ്കിലും ഇതുവരെ യാതൊരുവിധ അറ്റകുറ്റപ്പണികളും നടത്തിയിട്ടില്ലെന്നാണ് ആക്ഷേപം. അഞ്ച് നിലകളായിട്ടുള്ള വാച്ച് ടവറിന്റെ ചവിട്ടുപടികളെല്ലാം പായൽ പിടിച്ച് തെന്നി വീഴുന്ന അവസ്ഥയിലാണുള്ളത്. ടൂറിസം കേന്ദ്രങ്ങൾ എല്ലാം സഞ്ചാരികൾക്കായി തുറന്നുകൊടുക്കണമെന്ന് പറഞ്ഞിട്ടും വാച്ച് ടവർ തുറന്നു കൊടുക്കാതെ അനങ്ങാപ്പാറ നയം സ്വീകരിക്കുകയാണ് അധികൃതർ. മാസങ്ങൾക്ക് ശേഷം ഭൂതത്താൻകെട്ടിൽ ബോട്ടിംഗ് തുടങ്ങിയിട്ടുണ്ട്.