അടിമാലി: ടൗണിനെ ക്യാമറ നിരീക്ഷണത്തിലാക്കുന്ന പദ്ധതി വിഷൻ അടിമാലിയുടെ നിർമ്മാണ ജോലികൾക്ക് തുടക്കം കുറിച്ചു. പൊതുജന പങ്കാളിത്തതോടെ ധനസമാഹരണം നടത്തി വ്യാപാരി വ്യവസായി ഏകോപനസമതിയുടെയും അടിമാലി ജനമൈത്രി പൊലീസിന്റെയും പഞ്ചായത്തിന്റെയും സഹകരണത്തോടെയാണ് പദ്ധതി നടപ്പിലാക്കുന്നത്. നിർമ്മാണോദ്ഘാടനം അഡ്വ. എ. രാജ എം.എൽ.എ നിർവഹിച്ചു. അടിമാലി ടൗണിന്റെ പൂർണ വികസനത്തിനായി കൂടുതൽ പദ്ധതികൾ നടപ്പിലാക്കേണ്ടതുണ്ടെന്നും എം.എൽ.എ പറഞ്ഞു. പദ്ധതിയുടെ ഭാഗമായി 32 ക്യാമറകൾ ആദ്യഘട്ടമായി ടൗണിന്റെ വിവിധ ഭാഗങ്ങളിൽ സ്ഥാപിക്കും. ഇതിൽ നാലെണ്ണം രാത്രികാലത്ത് പോലും വാഹനങ്ങളുടെ നമ്പർ പ്ലേറ്റുകൾ പകർത്താൻ കഴിയുന്ന നൈറ്റ് വിഷനോടു കൂടിയ ക്യാമറകളാണ്. അടിമാലി പൊലീസ് സ്റ്റേഷൻ കേന്ദ്രീകരിച്ച് ക്യാമറകളുടെ നിരീക്ഷണ കേന്ദ്രം ക്രമീകരിക്കും. ഒരു മാസത്തിനുള്ളിൽ പദ്ധതിയുടെ പൂർത്തീകരണം ലക്ഷ്യമിട്ടുള്ള പ്രവർത്തനങ്ങളാണ് നടന്നു വരുന്നത്. അടിമാലിയിൽ നടന്ന ഉദ്ഘാടന ചടങ്ങിൽ പഞ്ചായത്ത് പ്രസിഡന്റ് ഷേർളി മാത്യു അദ്ധ്യക്ഷത വഹിച്ചു. അടിമാലി സി.ഐ കെ. സുധീർ, ഗ്രാമപഞ്ചായത്തംഗങ്ങൾ, വ്യാപാരി വ്യവസായി ഏകോപന സമതി പ്രതിനിധികൾ, ക്യാമറ സ്ഥാപിക്കുന്നതുമായി ബന്ധപ്പെട്ട ജനകീയ കമ്മിറ്റി ഭാരവാഹികൾ എന്നിവർ പങ്കെടുത്തു.