തൊടുപുഴ: ട്രാൻസ്‌ജെൻഡറുകൾക്ക് അർഹിക്കുന്ന പരിഗണനയും നിയമം അനുശാസിക്കുന്ന നീതിയും ഉറപ്പ് വരുത്തണമെന്ന് ജില്ലാ ലീഗൽ സർവ്വീസസ് അതോറിറ്റി സെക്രട്ടറിയും സബ് ജഡ്ജുമായ പി.എ. സിറാജുദ്ദീൻ ആവശ്യപ്പെട്ടു. ജില്ലയിലെ വിവിധ വകുപ്പുകളിലെ ജീവനക്കാർക്കായി സാമൂഹ്യനീതി വകുപ്പിന്റെ ആഭിമുഖ്യത്തിൽ ട്രാൻസ്‌ജെൻഡർ വ്യക്തികളുടെ ക്ഷേമവും നിയമ പരിരക്ഷയും എന്ന വിഷയത്തെ ആസ്പദമാക്കി തൊടുപുഴയിൽ സംഘടിപ്പിച്ച പരിശീലന പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ട്രാൻസ്‌ജെൻഡർ വ്യക്തികൾ നേരിടേണ്ടി വരുന്ന വിവേചനങ്ങളും മനുഷ്യാവകാശ ലംഘനങ്ങളും ഒഴിവാക്കുന്നതിനും വിവിധ വകുപ്പുകളിൽ നിന്നുള്ള സേവനങ്ങളുടെ ലഭ്യതയും തുല്യ അവകാശങ്ങളും ഉറപ്പ് വരുത്തുകയുമാണ് പരിശീലന പരിപാടിയുടെ ലക്ഷ്യം.
യോഗത്തിൽ മുൻസിപ്പൽ ക്ഷേമകാര്യ സ്റ്റാന്റിംഗ് കമ്മിറ്റി ചെയർപേഴ്‌സൺ ഷീജ ഷാഹുൽ ഹമീദ് അദ്ധ്യക്ഷയായി. ജില്ലാ പ്രൊബേഷൻ ഓഫീസർ ജി. ഗോപകുമാർ, ജില്ലാ സാമൂഹ്യനീതി ഓഫീസ് സീനിയർ സൂപ്രണ്ട് ബിന്ദു.എസ്. നായർ എന്നിവർ സംസാരിച്ചു. ഡോ. വി. സജികുമാർ, അഡ്വ. പുരുഷോത്തമൻ പിള്ള, ശ്യാമ എസ്. പ്രഭ, പ്രജിത്ത് പി.കെ, ജോമോൾ തോമസ് എന്നിവർ വിവിധ വിഷയങ്ങളിലായി ക്ലാസുകൾ നയിച്ചു.