പഴയങ്ങാടി: കല്യാശ്ശേരി മണ്ഡലത്തിലെ 5 സർക്കാർ ഹയർ സെക്കൻഡറി സ്കൂളുകളുടെ അടിസ്ഥാന സൗകര്യ വികസനത്തിന് സമഗ്ര പദ്ധതി ഒരുങ്ങുന്നു. പദ്ധതി പ്രവർത്തന അവലോകന യോഗം എം. വിജിൻ എം.എൽ.എയുടെ നേതൃത്വത്തിൽ മാടായി റസ്റ്റ്ഹൗസിൽ ചേർന്നു. കല്ല്യാശേരി ഗവ. ഹയർ സെക്കൻഡറി സ്കൂൾ, കുഞ്ഞിമംഗലം ഗവ. ഹയർ സെക്കൻഡറി സ്കൂൾ, ചെറുകുന്ന് ഗവ. ബോയ്സ് ഹയർ സെക്കൻഡറി സ്കൂൾ, കൊട്ടില ഗവ. ഹയർ സെക്കൻഡറി സ്കൂൾ, മാട്ടൂൽ ഗവ. ഹയർ സെക്കൻഡറി സ്കൂൾ എന്നീ സ്കൂളുകൾക്കാണ് പൊതുവിദ്യാഭ്യാസ സംരക്ഷണ യജ്ഞം പദ്ധതിയുടെ ഭാഗമായി 3 കോടി രൂപ വീതം കിഫ്ബി പദ്ധതിയിൽ ഉൾപ്പെടുത്തി സംസ്ഥാന സർക്കാർ അനുവദിച്ചത്.

പൊതുവിദ്യാഭ്യാസ സംരക്ഷണ യജ്ഞം കോ-ഓർഡിനേറ്റർ പി.വി പ്രദീപൻ, കിലയുടെ അസിസ്റ്റന്റ് പ്രൊജക്ട് എൻജിനീയർ ഹരിത ഗണേശൻ പി എന്നിവർ പദ്ധതി വിശദീകരിച്ചു.

യോഗത്തിൽ പഞ്ചായത്ത് പ്രസിഡന്റുമാരായ ടി.ടി ബാലകൃഷ്ണൻ (കല്യാശ്ശേരി), ഫാരിഷ ടീച്ചർ (മാട്ടൂൽ), പ്രാർത്ഥന എ (കുഞ്ഞിമംഗലം), രതി കെ (കണ്ണപുരം),​ ജില്ലാ പഞ്ചായത്ത് അംഗങ്ങളായ എസ്.കെ.ആബിദ, സി.പി ഷിജു, യു.വി രാജീവൻ (കല്യാശ്ശേരി ബ്ലോക്ക് പഞ്ചായത്ത് അസി.എക്സി.എൻജിനീയർ), വൃന്ദ പ്രകാശ് പി.വി (കില), പ്രിൻസിപ്പൽമാർ, ഹെസ് മാസ്റ്റർമാർ, പി.ടി.എ പ്രസിഡന്റുമാർ, ഗ്രാമ പഞ്ചായത്ത് അസിസ്റ്റന്റ് എൻജിനീയർമാർ യോഗത്തിൽ പങ്കെടുത്തു.

നിർവഹണ ചുമതല കിലയ്ക്ക്

സാങ്കേതിക പ്രശ്നങ്ങൾ പരിഹരിച്ച് വിശദമായ പദ്ധതി രേഖ തയ്യാറാക്കി കിഫ്ബിയുടെ അംഗീകാരത്തിന് സമർപ്പിക്കും. കേരള ഇൻസ്റ്റിറ്റ്യൂട്ട് ഓഫ് ലോക്കൽ അഡ്മിനിസ്ടേഷ (കില ) നാണ് പദ്ധതിയുടെ നിർവഹണ ചുമതല.

ഏർപ്പെടുത്തുന്ന സൗകര്യങ്ങൾ

കല്യാശ്ശേരി സ്കൂളിൽ രണ്ട് നില കെട്ടിടം, മൂന്ന് ക്ലാസ് റൂം, സയൻസ് ലാബ്, കംപ്യൂട്ടർ ലാബ്, ലൈബ്രറി, ഡൈനിംഗ് ഹാൾ, ടോയ് ലെറ്റ്

കൊട്ടില സ്കൂളിൽ രണ്ട് നില കെട്ടിടം, അഞ്ച് ക്ലാസ് മുറികൾ, എൻ.എസ്.എസ് റൂം, എസ്.പി.സി റൂം, ലാബ്, സ്പോർട്സ് റൂം, ലൈബ്രറി, ഐ.ടി, ഫിസിക്സ്, കെമിസ്ട്രി, ബോട്ടണി, സുവോളജി ലാബുകൾ

മാട്ടൂൽ സ്കൂളിൽ മൂന്ന് നിലകളിലായി 18 ക്ലാസ് മുറികൾ, ടോയ്ലെറ്റ് സൗകര്യം

കുഞ്ഞിമംഗലത്ത് 4 ക്ലാസ് മുറികൾ, സ്റ്റാഫ് റൂം, ഫിസിക്സ്, കെമിസ്ട്രി ലാബ്, ഓഡിറ്റോറിയം, സ്പോർട്സ് റൂം, ഓഫീസ് റൂം, ഐ.ടി, ബോട്ടണി, സുവോളജി ലാബ് സൗകര്യം

ചെറുകുന്ന് ബോയ്സിൽ 2 നില 6 ക്ലാസ് റൂം, സ്റ്റാഫ് റൂം, സയൻസ്, മാത്‌സ് ലാബ്, ടോയ് ലെറ്റ്