കണ്ണൂർ: ജില്ലയിലെ പ്രധാനപ്പെട്ട കാവുകളുടെ സംരക്ഷണവും പരിപാലനവുമായി ബന്ധപ്പെട്ട് നടത്തിയ സന്ദർശനത്തിന്റെയും വിവര ശേഖരണത്തിന്റെയും അടിസ്ഥാനത്തിൽ സ്വതന്ത്ര പഠന റിപ്പോർട്ട് തയ്യാറാക്കി നിയമസഭയ്ക്ക് സമർപ്പിക്കുമെന്ന് നിയമസഭാ പരിസ്ഥിതി കമ്മിറ്റി ചെയർമാൻ ഇ.കെ. വിജയൻ എം.എൽ.എ അറിയിച്ചു. ജില്ലയിലെ പ്രധാനപ്പെട്ട കാവുകൾ ചെയർമാന്റെ നേതൃത്വത്തിൽ കമ്മിറ്റി അംഗങ്ങളായ പി.കെ. ബഷീർ, ടി.ഐ മധുസൂദനൻ, സജീവ് ജോസഫ്, കെ.ഡി പ്രസേനൻ, ജോബ് മൈക്കിൾ, ലിന്റോ ജോസഫ് എന്നീ എം.എൽ.എമാരുടെ നേതൃത്വത്തിൽ സന്ദർശിച്ചു.
മിക്ക കാവുകളും മതപരമായ ആചാരങ്ങളുടെയും വിശ്വാസങ്ങളുടെയും ഭാഗമായി വീടുകളിലും ക്ഷേത്രങ്ങളിലും സംരക്ഷിച്ചു വന്നിരുന്നുവെങ്കിലും കാലാന്തരത്തിൽ നാശോൻമുഖമായ ഇവയുടെ സംരക്ഷണം പാരിസ്ഥിതിക സന്തുലനാവസ്ഥ നിലനിർത്തുന്നതിനായി പ്രോത്സാഹിപ്പിക്കേണ്ടത് അനിവാര്യമാണെന്ന് സമിതി വിലയിരുത്തി. കാവുകളുടെ വിസ്തൃതി പല കാരണങ്ങളാൽ കുറഞ്ഞതായി ചെയർമാൻ പറഞ്ഞു.
രാവിലെ ധർമ്മടം അണ്ടല്ലൂർ കാവിൽനിന്നാണ് സന്ദർശനം ആരംഭിച്ചത്. കെ.പി. മോഹനൻ, എം.എൽ.എ, മലബാർ ദേവസ്വം ബോർഡ് പ്രതിനിധികൾ, ക്ഷേത്ര ഊരാളൻമാർ എന്നിവരും ഇവിടെ ഉണ്ടായിരുന്നു.
തുടർന്ന് ശ്രീകണ്ഠപുരം വയക്കര ശ്രീ ദൈവത്താർ വനശാസ്താ കാവ്, ഏഴിമലയിലെ ജൈവ വൈവിദ്ധ്യം, തെയ്യോട്ട്കാവ്, കൊങ്ങിണിച്ചാംകാവ്, വെരീക്കര കാവ് എന്നിവയും സമിതി നേരിട്ട് സന്ദർശിച്ചു.
എ.ഡി.എം കെ.കെ. ദിവാകരൻ, കോഴിക്കോട് മേഖലാ സോഷ്യൽ ഫോറസ്ട്രി കൺസർവേറ്റർ കീർത്തി, കണ്ണൂർ ഡി.എഫ്.ഒ പി. കാർത്തിക്, ഹരിത കേരള മിഷൻ ജില്ലാ കോ ഓർഡിനേറ്റർ ഇ.കെ. സോമശേഖരൻ തുടങ്ങിയവർ പങ്കെടുത്തു. മറ്റ് പരിസ്ഥിതി പ്രശ്നങ്ങൾ സംബന്ധിച്ചും സമിതി പരാതി സ്വീകരിച്ചു.
അണ്ടല്ലൂർ കാവിൽ 3.65 കോടിയുടെ പദ്ധതികൾ നടപ്പാക്കിവരുന്നു
ഒരേക്കർ വിസ്തൃതിയിലുള്ള അണ്ടല്ലൂർ താഴെകാവിൽ ഏറെ പ്രായം ചെന്ന, ജപ്പാനിലും കൊറിയയിലും മാത്രം കാണുന്നവ ഉൾപ്പെടെ അപൂർവ്വമായ മരങ്ങൾ ഉണ്ടെന്നും അതിന്റെ പഠന റിപ്പോർട്ട് തയ്യാറാക്കിയതായും ക്ഷേത്രം ഭാരവാഹികൾ അറിയിച്ചു. അണ്ടല്ലൂർ കാവിൽ സ്ഥലം എം.എൽ.എ മുഖ്യമന്ത്രി പിണറായി വിജയൻ അനുവദിച്ച 3.65 കോടി രൂപയുടെ വിവിധ പദ്ധതികൾ നടപ്പിലാക്കുന്നുണ്ട്. മിയാവാക്കി പദ്ധതി പ്രകാരം എട്ട് ലക്ഷം രൂപ അനുവദിച്ച് താഴെകാവിൽ വനവത്കരണം നടപ്പിലാക്കുന്നു.
കണ്ണൂർ സംസ്ഥാനത്ത ഏറ്റവും കൂടുതൽ കാവുകൾ ഉള്ള ജില്ല
മലബാർ ദേവസ്വം ബോർഡിന് കീഴിൽ 39 കാവുകൾ