സുൽത്താൻബത്തേരി: ബത്തേരി നിയോജക മണ്ഡലത്തിൽ രണ്ട് പദ്ധതികൾക്കായി 15.5 കോടി രൂപയുടെ ഭരണാനുമതി ലഭിച്ചതായി ഐ.സി.ബാലകൃഷ്ണൻ എം.എൽ.എ അറിയിച്ചു. മീനങ്ങാടി തുമ്പക്കുനി പാലത്തിനും, അപ്രോച്ച് റോഡിനുമായി 12 കോടിയുടെയും, മീനങ്ങാടി ഗവ. ഹൈസ്‌കൂളിന് പുതിയ കെട്ടിടം നിർമിക്കുന്നതിന് 3.5 കോടിയുടെയുമാണ് ഭരണാനുമതി ലഭിച്ചത്.
മീനങ്ങാടി ഗ്രാമപഞ്ചായത്തിലെ പുറക്കാടി പുഴയ്ക്കു കുറുകെയാണ് കോൺക്രീറ്റ് പാലം നിർമിക്കുന്നത്. തുമ്പക്കുനിക്കാരുടെ പതിറ്റാണ്ടുകൾ നീണ്ട ആവശ്യമാണ് പാലം. ഈ പാലം വരുന്നതോടെ ചെണ്ടക്കുനിയിലൂടെ തുമ്പക്കുനിവഴി അപ്പാടേയ്ക്കുള്ള റോഡിനും, തുമ്പക്കുനിയിലെ പഞ്ചായത്ത് മിനി സ്റ്റേഡിയത്തിനും ശാപമോക്ഷം ലഭിക്കും. അന്തർദേശീയ നിലവാരത്തിലേക്ക് ഉയർത്തിയ മീനങ്ങാടി ഗവ. ഹൈസ്‌കൂളിന് ഡൈനിങ് ഹാൾ, അടുക്കള, മറ്റ് കെട്ടിടങ്ങൾ തുടങ്ങിയ കൂടുതൽ സൗകര്യങ്ങളൊരുക്കുന്നതിന് വേണ്ടിയാണ് 3.5 കോടി അനുവദിച്ചത്.