കുന്ദമംഗലം: സി.ഡബ്ല്യു.ആർ.ഡി.എമ്മിൽ ജർമ്മൻ സഹായത്തോടെ കാലാവസ്ഥാ വ്യതിയാന പഠന കേന്ദ്രം സ്ഥാപിക്കുന്നതിന് അനുമതിയായി. ഇന്ത്യയിൽ ആരംഭിക്കുന്ന രണ്ടു കേന്ദ്രങ്ങളിലൊന്നാണിത്.
സെന്ററിലെ ജല പൈതൃക മ്യൂസിയം പൊതുജനങ്ങൾക്കായി തുറന്നുകൊടുക്കുന്ന ചടങ്ങിലായിരുന്നു ഇതുസംബന്ധിച്ച പ്രഖ്യാപനം. മ്യൂസിയത്തിന്റെ ഉദ്ഘാടനം പി.ടി.എ റഹീം എം.എൽ.എ നിർവഹിച്ചു.
സംസ്ഥാന സർക്കാരിന്റെ ശാസ്ത്ര സാങ്കേതിക വകുപ്പിന് കീഴിൽ പ്രവർത്തിച്ചു വരുന്ന ഈ സ്ഥാപനത്തിലെ ഏറ്റവും പുതിയ പദ്ധതിയാണ് ജല പൈതൃക മ്യൂസിയം. കേരളത്തിന്റെ പരമ്പരാഗത ജല സംരക്ഷണ പരിപാലന രീതികൾ ചിത്രങ്ങളിലൂടെയും ഫോട്ടോകളിലൂടെയും മാതൃകകളിലൂടെയും പ്രദർശിപ്പിച്ചിരിക്കുകയാണ് ഇവിടെ.
ഉദ്ഘാടനച്ചടങ്ങിൽ ശാസ്ത്ര സാങ്കേതിക വകുപ്പ് എക്‌സിക്യൂട്ടിവ് വൈസ് പ്രസിഡന്റ് പ്രൊഫ.കെ.പി സുധീർ അദ്ധ്യക്ഷനായിരുന്നു. കുന്ദമംഗലം ഗ്രാമപഞ്ചായത്ത് പ്രസിഡന്റ് ലിജി പുൽക്കുന്നുമ്മൽ, വാർഡ് മെമ്പർ ലിബിന രാജേഷ്, സ്‌കൂൾ ഓഫ് മാത്തമാറ്റിക്‌സ് ഡയറക്ടർ പ്രൊഫ.കല്ല്യാൺ ചക്രവർത്തി, മലബാർ ബോട്ടാണിക്കൽ ഗാർഡൻ സീനിയർ സയന്റിസ്റ്റ് ഡോ.എൻ.എസ് പ്രദീപ് എന്നിവർ സംസാരിച്ചു. സി.ഡബ്ല്യു.ആർ.ഡി.എം എക്‌സിക്യൂട്ടിവ് ഡയറക്ടർ ഡോ.മനോജ് പി.സാമുവൽ സ്വാഗതവും ട്രെയ്‌നിംഗ് വിഭാഗം മേധാവി ഡോ.ജി.കെ അമ്പിളി നന്ദിയും പറഞ്ഞു.