കമ്പളക്കാട്: കേരളത്തിലെ ചെറുകിട പാദരക്ഷാ വ്യാപാരികളുടെ കൂട്ടായ്മയായ കേരള റീട്ടെയിൽ ഫൂട്ട്‌വെയർ അസോസിയേഷൻ ജില്ലാ കമ്മിറ്റിയുടെ ആഭിമുഖ്യത്തിൽ 'വയനാട് ഫൂട്ട് ഫെസ്റ്റ്' എന്ന പേരിൽ പാദരക്ഷാ വ്യാപാരികളുടെ ജില്ലാസംഗമം സംഘടിപ്പിച്ചു. ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ ഉദ്ഘാടനം ചെയ്തു. ജില്ലാ പ്രസിഡന്റ് കെ.സി.അൻവർ അദ്ധ്യക്ഷത വഹിച്ചു. കണിയാമ്പറ്റ ഗ്രാമപഞ്ചായത്ത് പ്രസിഡന്റ് കമലാ രാമൻ മുഖ്യാതിഥിയായി. ഏകോപന സമിതി ജില്ലാ പ്രസിഡന്റ് കെ.കെ.വാസുദേവൻ മുഖ്യപ്രഭാഷണവും റാഷിദ് ഗസ്സാലി പ്രമേയ പ്രഭാഷണവും നടത്തി.

ജില്ലയിലെ മുന്നൂറിൽപ്പരം വരുന്ന ചെറുകിട പാദരക്ഷാ വ്യാപാരികൾ പങ്കെടുത്തു. ജില്ലാ ജനറൽ സെക്രട്ടറി ഷാജി കല്ലടാസ് സംഘടനാ റിപ്പോർട്ട് അവതരിപ്പിച്ചു. അംഗങ്ങളുടെ മക്കളിൽ ഉന്നത വിജയം നേടിയവരെ സംസ്ഥാന വർക്കിങ് പ്രസിഡന്റ് ധനീഷ് ചന്ദ്രനും മുതിർന്ന വ്യാപാരികളെ സംസ്ഥാന വൈസ് പ്രസിഡന്റ് മുഹമ്മദലി താമരശേരിയും ആദരിച്ചു.
സംഘാടക സമിതി ചെയർമാൻ കെ.മുഹമ്മദ് ആസിഫ് സ്വാഗതവും ജനറൽ കൺവീനർ ഷമീം പാറക്കണ്ടി നന്ദിയും പറഞ്ഞു. പുതുതായി വിപണിയിലെത്തുന്ന പാദരക്ഷകളുടെ പ്രദർശനവും നടന്നു.