താമരശ്ശേരി : കുതിച്ചുയരുന്ന പച്ചക്കറി വില പിടിച്ചു നിറുത്താൻ സഞ്ചരിക്കുന്ന പച്ചക്കറി സ്റ്റാളുമായി കൃഷി വകുപ്പും വി.എഫ്.പി.സി.കെ യും. രണ്ട് വാഹനങ്ങളാണ് ഇതിനായി സജ്ജമായിരിക്കുന്നത്. പദ്ധതിയുടെ ഉദ്ഘാടനം ഇന്ന് രാവിലെ 8.30 ന് വെള്ളാനൂരിൽ ചാത്തമംഗലം ഗ്രാമപഞ്ചായത്ത് പ്രസിഡന്റ് ഓളിക്കൽ ഗഫൂർ നിർവഹിക്കും.വെള്ളനൂർ കുന്നമംഗലം കോഴിക്കോട് റൂട്ടിൽ ഒരു വാഹനവും മുക്കം താമരശ്ശേരി റൂട്ടിൽ മറ്റൊരു വാഹനവും എന്ന നിലയിൽ ആണ് വണ്ടികൾ ക്രമീകരിച്ചിരിക്കുന്നത്. ഹോർട്ടി കോർപ് പച്ചക്കറി കർഷകർ എന്നിവരിൽ നിന്നു ഹോൾസെയിൽ വിലയിൽ പച്ചക്കറി സംഭരിച്ച് അതേ വിലക്ക് തന്നെ വിൽക്കുകയാണ് ചെയ്യുന്നത്. നിലവിൽ തക്കാളി വണ്ടി ഇത്തരത്തിൽ വിപണനം നടത്തുന്നുണ്ട്. ഈ വാഹനങ്ങളിൽ നിന്നും മറ്റു പച്ചക്കറികളും കുറഞ്ഞ വിലയിൽ പൊതു ജനങ്ങൾക്ക് ലഭ്യമാക്കുന്നതിലൂടെ പച്ചക്കറി വില നിയന്ത്രിച്ചു നിറുത്തുകയാണ് സർക്കാർ ലക്ഷ്യമാക്കുന്നത്.