കടുത്തുരുത്തി : കടുത്തുരുത്തി മിനി സിവിൽ സ്​റ്റേഷനിലേക്ക് വിവിധ സർക്കാർ ഓഫീസുകൾ മാ​റ്റി സ്ഥാപിക്കുന്നതിന് ആവശ്യമായ അടിസ്ഥാന സൗകര്യങ്ങൾ ഏർപ്പെടുത്തുന്നതിനും ഓഫിസ് മുറികൾ പുന: ക്രമീകരിക്കുന്നതിനുമായി എം.എൽ.എ ഫണ്ടിൽ നിന്ന് 30 ലക്ഷം രൂപ അനുവദിച്ചതായി മോൻസ് ജോസഫ് എം.എൽ.എ അറിയിച്ചു. മിനി സിവിൽ സ്​റ്റേഷൻ ഉദ്ഘാടനത്തിന് ശേഷം കടുത്തുരുത്തി ഗ്രാമപഞ്ചായത്ത് ഓഫീസ് മാത്രമാണ് പ്രവർത്തന സജ്ജമാക്കാൻ കഴിഞ്ഞത്. സിവിൽ സ്​റ്റേഷൻ കമ്മ്യൂണി​റ്റി ഹാൾ, താഴത്തെ നിലയിലുള്ള പാർക്കിംഗ് സൗകര്യങ്ങൾ, ഇലക്ട്രിക് വർക്കുകളുടെ പൂർത്തീകരണം എന്നിവയെല്ലാം നടപ്പാക്കാനുണ്ട്. എല്ലാ സർക്കാർ ഓഫീസുകളും മിനി സിവിൽ സ്റ്റേഷനിലേക്ക് മാ​റ്റുന്നതിന് മുന്നോടിയായി ഓരോ വകുപ്പിന്റെയും ആവശ്യങ്ങൾ പരിശോധിക്കുന്നതിന് ബന്ധപ്പെട്ട ഉദ്യോഗസ്ഥരുടെ യോഗം ഉടനെ വിളിച്ചുചേർക്കുമെന്നും മോൻസ് ജോസഫ് അറിയിച്ചു.