മുണ്ടക്കയം: കോട്ടയം ജില്ലയിലെ മികച്ച കമ്മ്യൂണിറ്റി ഹെൽത്ത് സെന്ററുകൾക്കുള്ള കായകല്പ അവാർഡിന് കാഞ്ഞിരപ്പള്ളി ബ്ലോക്ക് പഞ്ചായത്തിന്റെ മേൽനോട്ടത്തിൽ പ്രവർത്തിക്കുന്ന മുണ്ടക്കയം ഗവ.ആശുപത്രി അർഹമായി. കോട്ടയം ജില്ലാ ആശുപത്രിയിൽ നടന്ന അവാർഡുദാന ചടങ്ങിൽ ആശുപത്രിയെ പ്രതിനിധീകരിച്ച് ഡോ. മാത്യു തോമസും ബ്ലോക്ക് പഞ്ചായത്ത് വൈസ് പ്രസിഡന്റ് സാജൻ കുന്നത്തും ആശുപത്രി അക്കൗണ്ടന്റ് സജിമോനും ചേർന്ന് മന്ത്രി വി.എൻ. വാസവനിൽ നിന്ന് അവാർഡ് ഏറ്റുവാങ്ങി. തിരുവഞ്ചൂർ രാധാകൃഷ്ണൻ എം.എൽ.എ പങ്കെടുത്തു. ആരോഗ്യ സ്ഥാപനങ്ങളിലെ ശുചിത്വം, അണുബാധ നിയന്ത്രണം, ആശുപത്രിയിലെ സൗകര്യങ്ങൾ, അവശ്യമരുന്നുകളുടെ ലഭ്യത, ലാബ് സൗകര്യങ്ങൾ, കൊവിഡ് പ്രതിരോധ പ്രവർത്തനങ്ങൾ, മാലിന്യ നിർമാർജനം, ആരോഗ്യബോധവത്കരണം എന്നിവയെല്ലാം പരിഗണിച്ചാണ് അവാർഡ്. ഒരു ലക്ഷം രൂപയും ഫലകവുമടങ്ങുന്നതാണ് അവാർഡ്.