വൈക്കം : സി.പി.എം വെച്ചൂർ വെസ്​റ്റ് ലോക്കൽ കമ്മി​റ്റിയുടെ നേതൃത്വത്തിൽ ക്ലീൻ വേമ്പനാട് കാമ്പയിന്റെ ഭാഗമായി വേമ്പനാട്ട് കായലിന്റെ തീരത്ത് അടിഞ്ഞുകൂടിയ പുൽക്കൂനകളും പോളപ്പായലും നീക്കംചെയ്തു. മത്സ്യത്തൊഴിലാളികളും കക്കാ വാരൽ തൊഴിലാളികളും കൂടുതലായി താമസിക്കുന്ന മേഖലയിൽ അടിഞ്ഞുകൂടിയ പുല്ലും പായലുകളും മത്സ്യബന്ധത്തിനും കക്ക വാരലിനും വലിയ പ്രതിസന്ധി സൃഷ്ടിച്ചിരുന്നു. ഈ സാഹചര്യത്തിലാണ് കായൽ ശുചീകരിക്കുന്നതിനുള്ള പ്രവർത്തനങ്ങളുമായി സി.പി.എം മുന്നോട്ടു വന്നത്. പാർട്ടി പ്രവർത്തകർക്കൊപ്പം തൊഴിലാളികളും നാട്ടുകാരും ശുചീകരണത്തിൽ പങ്കാളികളായി. കായൽ തീരത്ത് വെച്ചൂർ പള്ളി ജെട്ടി മുതൽ സ്വാമിക്കൽ ജെട്ടിയ്ക്ക് കിഴക്കുവശം വരെയുള്ള രണ്ടു കിലോമീ​റ്റർ ഭാഗമാണ് ശുചീകരിച്ചത്. ജില്ലാ കമ്മി​റ്റി അംഗം കെ.കെ.ഗണേശൻ ഉദ്ഘാടനം ചെയ്തു. വെച്ചൂർ വെസ്​റ്റ് ലോക്കൽ സെക്രട്ടറി കെ.കെ.ജയപ്രസാദ് അദ്ധ്യക്ഷത വഹിച്ചു. ഏരിയ കമ്മി​റ്റി അംഗം കെ.എസ്.ഷിബു, നഗരിന ബ്രാഞ്ച് സെക്രട്ടറി കെ.ഡി.ഷണ്മുഖൻ എന്നിവർ സംസാരിച്ചു.