വൈക്കം : പട്ടശ്ശേരി ശ്രീഘണ്ഠാകർണ്ണ ഭഗവതി ക്ഷേത്രത്തിൽ തിരുവാതിര ആറാട്ട് മഹോത്സവത്തിന് കൊടിയേറി. നിറദീപങ്ങളും വായ്ക്കുരവകളും ദേവീസ്തുതികളും വാദ്യഘോഷങ്ങളും ഭക്തിയേകിയ അന്തരീക്ഷത്തിൽ ക്ഷേത്രം തന്ത്റി പെരുമ്പളം കാർത്തികേയൻ കൊടിയേ​റ്റി. ക്ഷേത്രം മേൽശാന്തി ചെമ്മനത്തുകര സുമേഷ് ശാന്തി സഹകാർമ്മികത്വം വഹിച്ചു. ക്ഷേത്രം പ്രസിഡന്റ് ഉണ്ണി പുത്തൻതറയിൽ, സെക്രട്ടറി ലാലുമോൻ കുന്നത്ത്, വൈസ് പ്രസിഡന്റ് ഡി ഷൈമോൻ പനന്തറ എന്നിവർ നേതൃത്വം നൽകി. ഉത്സവാഘോഷത്തിലെ പ്രധാന ചടങ്ങായ പകൽപ്പൂരം ഞായറാഴ്ച വൈകിട്ട് 4 ന് നടക്കും. പകൽപൂരത്തോടൊപ്പം വിവിധ കേന്ദ്രങ്ങളിൽ നിന്ന് താലപ്പൊലികളുമെത്തും. 20 ന് തിരു ആറാട്ട് മഹോത്സവം. രാവിലെ 7.30 ന് പന്തീരടി പൂജ, 8 ന് ശ്രീബലി, 8.30 ന് നവകം, പഞ്ചഗവ്യം, കലശം, 9.30 ന് നാരായണീയ പാരായണം, 1.30 ന് അന്നദാനം, രാത്രി 9.30 ന് ആറാട്ടെഴുന്നള്ളിപ്പ്. തുടർന്ന് വലിയാനപ്പുഴ വലിയ കടവിലാണ് ആറാട്ട് തുടർന്ന് ക്ഷേത്രത്തിലേക്ക് ആറാട്ടെഴുന്നള്ളിപ്പും പുറപ്പെടും.