കോട്ടയം: ക്രിസ്മസ് - ന്യൂ ഇയർ സീസണുമായി ബന്ധപ്പെട്ട് സഞ്ചാരികൾ എത്തിത്തുടങ്ങി. കോടിമതയിൽ നിന്ന് ആലപ്പുഴയിലേക്കുള്ള ബോട്ടുയാത്രയ്ക്കായി ഏറെപ്പേർ എത്തുന്നു. കോടിമതയിൽ നിന്ന് പള്ളം വഴി ആലപ്പുഴയ്ക്ക് ബോട്ടിൽ മൂന്നുമണിക്കൂറിൽ സഞ്ചരിച്ചാൽ കായലോര കാഴ്ചകൾ ആസ്വദിക്കാനാവും. കോട്ടയം നഗരമദ്ധ്യത്തിൽ നിന്നു തന്നെ ബോട്ടിൽ കയറാമെന്നതാണ് ഈ യാത്രയുടെ സൗകര്യം.
കഴിഞ്ഞ ക്രിസ്മസ് കാലത്ത് കൊവിഡ് മൂലം വലിയ പ്രതിസന്ധിയാണ് ടൂറിസം മേഖലയിൽ ഉണ്ടായത്. കോടിമതയിൽ നിന്നും ആലപ്പുഴയ്ക്ക് മൂന്നു ബോട്ടുകളാണ് സർവീസ് നടത്തുന്നത്. സ്‌കൂളുള്ള ദിവസം ഒരു ബോട്ട് കാഞ്ഞിരത്ത് സർവീസ് അവസാനിപ്പിക്കും.
കോടിമതിയിൽനിന്ന് ആലപ്പുഴയ്ക്ക് ആദ്യസർവീസ് ആരംഭിക്കുന്നതിന് മുമ്പ് രാവിലെ 5ന് കാഞ്ഞിരം ജെട്ടിയിൽനിന്ന് ആലപ്പുഴയ്ക്ക് സർവീസ് നടത്തുന്നുണ്ട്. ആലപ്പുഴയിൽ നിന്നും രാത്രി 9 ന് കോടിമതിയിലേക്കും സർവീസ് നടത്തും.
വിദേശ ടൂറിസ്റ്റുകൾ എത്താൻ തുടങ്ങിയിട്ടില്ല. മറ്റ് സംസ്ഥാനത്തുനിന്നുള്ള വിനോദസഞ്ചാരികളും മുൻകാലങ്ങളിലേതുപോലെയില്ല. ന്യൂ ഇയർ ആകുന്നതോടെ ഇവരെയും പ്രതീക്ഷിക്കുന്നു. സ്വദേശികളും ഇതരജില്ലകളിൽ നിന്നുള്ളവരുമായ യാത്രക്കാരാണ് ഇപ്പോഴുള്ളത്. ഒരുദിവസം 10000 താഴെ വരുമാനം ലഭിക്കുന്നുണ്ട്. മുൻപ് സീസൺ സമയത്ത് ഇതിൽ കൂടുതൽ ലഭിച്ചിരുന്നു.
ടിക്കറ്റ് നിരക്ക്
കോടിമത- ആലപ്പുഴ
29 രൂപ
സർവീസ് സമയം
രാവിലെ 6.45, 11.30, ഉച്ചയ്ക്ക് 1,വൈകീട്ട് 4, 5.45
രോഗഭീതിയുണ്ടെങ്കിലും ഇത്തവണ ആളുകൾ ബോട്ടു സർവീസിനായി എത്തുന്നുണ്ട്. ക്രിസ്മസ്, ന്യൂ ഇയർ സീസൺ പ്രമാണിച്ച് വരും ദിവസങ്ങളിൽ കൂടുതൽ ആളുകൾ എത്തുമെന്നാണ് പ്രതീക്ഷ.
- നജീബ്, സ്‌റ്റേഷൻ മാസ്റ്റർ