പാലാ: നാട്ടുകാരൻ ഡി.വൈ.എസ്.പി. താരമായി, ജില്ലാ പൊലീസിന്റെ ചരിത്രത്തിലാദ്യമായി ജില്ലാ പൊലീസ് മീറ്റ് ചാമ്പ്യൻഷിപ്പ് പാലായ്ക്ക്.

കോട്ടയം ജില്ലാ ഹെഡ്ക്വാർട്ടറുമായി പാലാ സബ്ഡിവിഷൻ 208 പോയിന്റ് വീതം നേടി ചാമ്പ്യൻഷിപ്പ് പങ്കിടുകയായിരുന്നു.
പാലാ പെരിങ്ങുളം സ്വദേശികൂടിയായ പാലാ ഡിവൈ.എസ്.പി. ഷാജു ജോസാണ് പാലാ സബ്ഡിവിഷനെ നയിച്ചത്. മുൻവോളിബോൾതാരം കൂടിയായ ഷാജുവിന് 4X100 മീറ്റർ റിലേയിൽ സ്വർണ്ണം ലഭിച്ചു. ഷോട്ട്പുട്ടിലും ഹൈജംപിലും രണ്ടാംസ്ഥാനവും 100 മീറ്ററിൽ മൂന്നാം സ്ഥാനവും ലഭിച്ചു. പാലാ സബ്ഡിവിഷനിൽ ഈരാറ്റുപേട്ട ജനമൈത്രി പൊലീസിലെ എ.എസ്.ഐ. ബിനോയി തോമസ് ഹാമർത്രോയിലും ഷോട്ട്പുട്ടിലും ഡിസ്‌കസ് ത്രോയിലും (സീനിയർ വിഭാഗം) ഒന്നാം സ്ഥാനത്തോടെ വ്യക്തിഗത ചാമ്പ്യൻഷിപ്പ് നേടി. ബാസ്‌കറ്റ് ബോളിലെ ബെസ്റ്റ് പ്ലെയറും ബിനോയിയാണ്.

രാമപുരം സ്റ്റേഷനിലെ എ.ആർ. ജഗതി, ഈരാറ്റുപേട്ട സ്റ്റേഷനിലെ ശരത്കൃഷ്ണദേവ്, മരങ്ങാട്ടുപള്ളി സ്റ്റേഷനിലെ റെജിമോൾ സെബാസ്റ്റ്യൻ, രാമപുരം സ്റ്റേഷനിലെ തങ്കമ്മ എന്നിവരുടെ മിന്നുന്ന പ്രകടനത്തോടെയാണ് പാലാ സബ് ഡിവിഷന് ചരിത്രനേട്ടം സ്വന്തമായത്. ബാസ്‌കറ്റ് ബോളിൽ ഒന്നാം സ്ഥാനത്തെത്തിയ പാലാ സബ്ഡിവിഷൻ വോളിബോളിൽ രണ്ടാം സ്ഥാനത്തും വടംവലിയിൽ മൂന്നാംസ്ഥാനത്തും എത്തി. വിജയികൾക്ക് ജില്ലാ പൊലീസ് ചീഫ് ഡി. ശില്പ പുരസ്‌കാരങ്ങൾ വിതരണം ചെയ്തു. ചരിത്രത്തിലാദ്യമായി ഓവറോൾ ചാമ്പ്യൻഷിപ്പ് നേടിയ പാലാ സബ്ഡിവിഷനെ ജോസ് കെ. മാണി എം.പി., മാണി സി. കാപ്പൻ എം.എൽ.എ., പാലാ നഗരസഭ ചെയർമാൻ ആന്റോ ജോസ് പടിഞ്ഞാറേക്കര തുടങ്ങിയവർ അഭിനന്ദിച്ചു.