ചെന്നൈ: രാജ്യത്ത് കൊവിഡിന്റെ ഏറ്റവും പുതിയ വകഭേദമായ ഒമിക്രോൺ സ്ഥിരീകരിച്ചതിന് പിന്നാലെ തമിഴ്നാട്ടിലും തെലങ്കാനയിലും കൂടുതൽ കൊവിഡ് ക്ലസ്റ്ററുകൾ റിപ്പോർട്ടുചെയ്യുന്നത് ആശങ്കയ്ക്കിടയാക്കുന്നു. സ്കൂളുകളാണ് ക്ലസ്റ്ററുകൾ എന്നതാണ് ആശങ്ക കൂട്ടുന്നത്. തെലങ്കാനയിലെ സംഗറെഡ്ഡി ജില്ലയിലെ സ്കൂളിലും തമിഴ്‌നാട്ടിലെ തിരുപ്പൂർ ജില്ലയിലെ ഒരു സ്വകാര്യ സ്കൂളിലുമാണ് വിദ്യാർത്ഥികൾക്ക് കൂട്ടത്തോടെ കൊവിഡ് സ്ഥിരീകരിച്ചത്.

തെലങ്കാനയിലെ സംഗറെഡ്ഡി ജില്ലയിലെ മഹാത്മാ ജ്യോതിറാവു ഫുലെ വെൽഫെയർ സ്‌കൂളിൽ തിങ്കളാഴ്ച 46 വിദ്യാർത്ഥികൾക്ക് കൊവിഡ് സ്ഥിരീകരിച്ചിരുന്നു. തുടർന്ന് കഴിഞ്ഞദിവസം നടത്തിയ പരിശോധനയിൽ 27 പേർ കൂടി പോസിറ്റീവായി. ഇവിടെ ശേഷിക്കുന്ന വിദ്യാർത്ഥികളെയും ജീവനക്കാരെയും പരിശോധനയ്ക്ക് വിധേയരാക്കാനുള്ള തയ്യാറെടുപ്പിലാണ് അധികൃതർ.

തമിഴ്നാട്ടിലെ സ്കൂളിൽ 27 വിദ്യാർത്ഥികൾക്കാണ് കൊവിഡ് സ്ഥിരീകരിച്ചത്. ഇവിടെയും കൂടുതൽ വിദ്യാർത്ഥികളെ ഉടൻ പരിശോധനയ്ക്ക് വിധേയരാക്കും. കർണാടകത്തിലെ മെഡിക്കൽ, നഴ്സിംഗ് കോളേജ് ഉൾപ്പടെ നിരവധി വിദ്യാഭ്യാസ സ്ഥാപനങ്ങളിൽ കഴിഞ്ഞദിവസങ്ങളിൽ കൊവിഡ് ക്ലസ്റ്ററുകൾ രൂപപ്പെട്ടിരുന്നു. ഒമിക്രോൺ സ്ഥിരീകരിച്ച സാഹചര്യത്തിൽ സംസ്ഥാനത്ത് കടുത്ത ജാഗ്രത തുടരുകയാണ്.