തിരുവനന്തപുരം: കൊവിഡ് പ്രതിസന്ധി മൂലം കടക്കെണിയിലായ സ്ഥാപന ഉടമ തൂങ്ങി മരിച്ചു. പാപ്പനംകോട് എസ്റ്റേറ്റ് അവിട്ടത്തിൽ ഉണ്ണികൃഷ്ണൻ നായരാണ് (44) മരിച്ചത്. വഞ്ചിയൂരിൽ യു.കെ. ഗ്രാഫിക്സ് എന്ന സ്ഥാപനം നടത്തി വരുകയായിരുന്നു.

തിങ്കളാഴ്ച രാത്രിയാണ് ഉണ്ണികൃഷ്ണൻ നായർ ബന്ധുവിനെ വിവരം അറിയിച്ച ശേഷം സ്ഥാപനത്തിനുള്ളിൽ തൂങ്ങിയത്. ബന്ധുക്കൾ അന്വേഷിച്ചെത്തിയപ്പോഴേക്കും മരണം സംഭവിച്ചിരുന്നു. പ്രവാസിയായ ഉണ്ണികൃഷ്ണൻ നായർ കൊവിഡ് വരുന്നതിന് രണ്ടു മാസം മുമ്പാണ് ഫ്ളക്സ് പ്രിന്റിംഗ് ഉൾപ്പടെയുള്ള സ്ഥാപനം തുടങ്ങിയത്. കൊവിഡ് രൂക്ഷമായതോടെ സ്ഥാപനം അടച്ചിട്ടു. ഒന്നാം ഘട്ടത്തിന് ശേഷം തുറന്നപ്പോൾ പ്രവർത്തിക്കാതിരുന്നതു കാരണം മെഷീനുകൾ തകരാറിലാവുകയും സ്ഥാപനം മുന്നോട്ട് കൊണ്ടു പോകാനാവാത്ത സ്ഥിതിയിലെത്തുകയും ചെയ്തു. മെഷീനുകളുടെ തകരാറ് പരിഹരിച്ച് വീണ്ടും സ്ഥാപനം തുറക്കാമെന്ന പ്രതീക്ഷയിലായിരുന്നെങ്കിലും കടബാധ്യതകളിൽ നിന്ന് കര കയറാനായില്ലെന്ന് ബന്ധുക്കൾ പറഞ്ഞു. ഭാര്യ:രാജലക്ഷ്മി. മകൻ രണ്ട് വയസുള്ള അമർനാഥ്. മൃതദേഹം ശാന്തി കവാടത്തിൽ സംസ്‌കരിച്ചു.

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പരുകൾ 1056, 0471 2552056)