ഏറെ നാളത്തെ കാത്തിരിപ്പിനും അനിശ്ചിതത്വത്തിനുമൊടുവിൽ പുറത്തിറങ്ങിയ ബ്രഹ്മാണ്ഡ ചിത്രം മരയ്ക്കാറിന് സമ്മിശ്ര പ്രതികരണങ്ങളാണ് ലഭിച്ചുകൊണ്ടിരിക്കുന്നത്. ചിത്രത്തിന് അനുകൂല അഭിപ്രായങ്ങളും ലഭിച്ചിരുന്നെങ്കിലും പ്രതീക്ഷയ്ക്കൊത്ത നിലവാരം പുലർത്താൻ ചിത്രത്തിനായില്ലെന്ന് പലരും പ്രതികരിച്ചു. സിനിമയുടെ ടെക്നിക്കൽ വശങ്ങളെ പ്രേക്ഷകർ അഭിനന്ദിക്കുമ്പോഴും പ്രധാന കഥാപാത്രങ്ങളടക്കം പലരുടെയും പ്രകടനം മികവ് പുലർത്തിയില്ലെന്നും അഭിപ്രായങ്ങൾ ഉയരുകയാണ്. മരയ്ക്കാറുമായി ബന്ധപ്പെട്ട് സംവിധായകനും തിരക്കഥാകൃത്തുമായ അഖിൽ മാരാർ പങ്കുവച്ച ഫേസ് ബുക്ക് കുറിപ്പ് ശ്രദ്ധനേടുകയാണ്. ഒരു തുടക്കകാരനായ സംവിധായകൻ എന്ന നിലയിൽ മരയ്ക്കാർ ചില പാഠങ്ങൾ പഠിപ്പിച്ചുവെന്നാണ് അഖിൽ കുറിച്ചത്.

ഫേസ്ബുക്ക് പോസ്റ്റിന്റെ പൂർണരൂപം

ഒരു തുടക്കക്കാരനായ സിനിമ സംവിധായകൻ എന്ന നിലയിൽ കുഞ്ഞാലി മരക്കാർ സിനിമ എന്നെ പഠിപ്പിച്ച ചില പാഠങ്ങൾ..

1. സാഹചര്യങ്ങൾ നൽകുന്ന സമ്മര്ദങ്ങളും ബഡ്ജറ്റിന്റെ കുറവും പ്രേക്ഷകർ ഒരിക്കലും അംഗീകരിച്ചു നൽകില്ല..

അത് കൊണ്ട് ജോണർ തിരഞ്ഞെടുക്കുമ്പോൾ ശ്രദ്ധിക്കണം..

ഒരേ ജോണറിൽ പെട്ട ലോക സിനിമകളുമായി താരതമ്യം ചെയ്‌ത്‌ സമൂഹം നമ്മുടെ സൃഷ്ട്ടിയെ തരം താഴ്ത്തും..

2.ബന്ധങ്ങളും സ്നേഹവും പരിചയവും സിനിമയിൽ ഉപയോഗിക്കരുത്..

കഥാപാത്രങ്ങൾക്ക് ഏറ്റവും അനുയോജ്യരായവരെ അവരുടെ കഴിവിന് മാത്രം പ്രാധാന്യം കൊടുത്തു തിരഞ്ഞെടുക്കുക..

ഞാൻ അതിൽ ഉറച്ചു തന്നെ മുന്നോട്ട് പോകാൻ തീരുമാനിച്ചു..

3.എത്ര മികച്ച സൃഷ്ട്ടികൾ ചെയ്താലും ഒരു മോശം സൃഷ്ടി ചിലപ്പോൾ കരിയർ തന്നെ അവസാനിപ്പിച്ചേക്കാം..

മുന്നോട്ടുള്ള ഓരോ സിനിമയും എന്നെ സംബന്ധിച്ചു കൂടുതൽ മെച്ചപ്പെടുത്താനും

അത് പോലെ കൂടുതൽ പഠിക്കാനും തീരുമാനിച്ചു..

4.ഓരോരുത്തർക്കും ഓരോ മേഖലയിൽ പ്രത്യേക കഴിവ് കാണും...ആ കഴിവിനെ കൂടുതൽ മികച്ചതാക്കുക എന്നതിന് പ്രാധാന്യം കൊടുക്കുക..

രാജമൗലിക്ക് ഒരിക്കലും ഒരു തേന്മാവിൻ കൊമ്പത്തോ, ചിത്രമോ, ചന്ദ്ര ലേഖയോ ചെയ്യാൻ കഴിയില്ലായിരിക്കും..

അത് പോലെ അടൂരിന് ഒരു വാണിജ്യ സിനിമ എടുക്കാനും അറിയില്ലായിരിക്കും..

ഓരോ മേഖലയിൽ ഓരോരുത്തർ വിജയിക്കുന്നത് കണ്ട് സ്വന്തം കഴിവ് മറന്ന് അനുകരിക്കാൻ പോയാൽ കുഴിയിൽ വീഴും എന്ന മറ്റൊരു പാഠം..

5.സമൂഹം പറയുന്നതിന് ചെവി കൊടുക്കാതിരിക്കുക..

ഓരോ എഴുത്തുകാരും കഥയുടെ കാമ്പുകൾ കണ്ടെത്തുന്നത് അവരുടെ ചുറ്റുപാടിൽ നിന്നാകും..

അത് കൊണ്ടാണ് പഴയ കാല സിനിമകളിൽ നായർ, മേനോൻ കഥാപാത്രങ്ങൾ കൂടിയതും

ഇന്ന് മുസ്ലിം ക്രിസ്ത്യൻ പശ്ചാതലം കൂടുന്നതും..

ഇത് ആരുടെയും വർഗീയത അല്ല..അവർക്കതാണ് അറിയുന്നത്..

6.പൂർണമായും സിനിമ എന്റെ നിയന്ത്രണത്തിൽ ചെയ്യുക..

കാശ് മുടക്കുന്നവരും അഭിനയിക്കാൻ വരുന്നവരും സിനിമയിൽ സംവിധായകന്റെ മുകളിൽ നിൽക്കാൻ ഒരു കാരണവശാലും സമ്മതിക്കില്ല..

എന്തെന്നാൽ സിനിമയ്ക്ക് എന്ത് ദോഷം സംഭവിച്ചാലും ആത്യന്തികമായി അത് ബാധിക്കുന്നത് എന്നെ ആണെന്നും അത് വരെ ചുറ്റും നിന്ന് താളം അടിച്ചവന്മാർ കൈ മലർത്തി അവരുടെ ജോലിക്ക് പോകും എന്ന തിരിച്ചറിവ്..

7.നൂറ് കോടി മുതൽ മുടക്കോ റോബോട്ടിക്ക് കാമറ ഷോട്ടുകളോ ഒന്നുമല്ല ഒരു സിനിമയുടെ വിജയം..മികച്ച തിരക്കഥയും, കഥാപാത്രങ്ങൾ ആയി വേഷമിടുന്നവരുടെ അസാമാന്യ പ്രകടനവും, കഥ പറയാൻ ആവശ്യമായ ഷോട്ടുകളും ആണ് സിനിമയുടെ വിജയം..

അതാണ് ഇന്നും നിറഞ്ഞ സദസ്സിൽ ഓടുന്ന ജാനെ എ മൻ എന്ന സിനിമ നൽകുന്ന പാഠം..

NB: ആദ്യ സിനിമ അവസരം ആണ്..ഇനിയാണ് എന്റെ സിനിമ..