പാപ്പന്റെ രണ്ടാംഘട്ട ചിത്രീകരണം നാളെ മുതൽ നിർമ്മാണ പങ്കാളിയായി ഇഫാർ മീഡിയയും

മലയാളത്തിന്റെ മാസ്റ്റർ ക്രാഫ്റ്റ്സ്മാൻ ജോഷിയും സൂപ്പർതാരം സുരേഷ്ഗോപിയും വീണ്ടും ഒന്നിക്കുന്ന പാപ്പന്റെ രണ്ടാംഘട്ട ചിത്രീകരണം നാളെ ഇൗരാറ്റുപേട്ടയിൽ തുടങ്ങും. ഇനി ഇരുപതുദിവസത്തെ ചിത്രീകരണമാണ് പാപ്പന് അവശേഷിക്കുന്നത്. എബ്രഹാം മാത്യു മാത്തൻ എന്ന കഥാപാത്രത്തെയാണ് സുരേഷ് ഗോപി ഇൗ ബിഗ്ബഡ്ജറ്റ് ചിത്രത്തിൽ അവതരിപ്പിക്കുന്നത്.

വൻ വിജയമായ പൊറിഞ്ചു മറിയം ജോസിന് ശേഷം ജോഷി ഒരുക്കുന്ന പാപ്പൻ സുരേഷ്‌ഗോപിയുടെ 252ാമത്തെ ചിത്രംകൂടിയാണ്.ഭൂപതി, ലേലം, വാഴുന്നോർ, പത്രം തുടങ്ങി മലയാളത്തിന് നിരവധി സൂപ്പർഹിറ്റുകൾ സമ്മാനിച്ച ജോഷി സുരേഷ്‌ഗോപി കൂട്ടുകെട്ട് ഏഴ് വർഷങ്ങൾക്ക് ശേഷം വീണ്ടും ഒന്നിക്കുന്ന ചിത്രമാണിത്.ക്രൈം ത്രില്ലറായി ഒരുക്കുന്ന ചിത്രത്തിൽ ഗോകുൽ സുരേഷ്, നീത പിള്ള, നൈല ഉഷ, ആശ ശരത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ, തുടങ്ങി വമ്പൻ താരനിരയാണ് അണിനിരക്കുന്നത്. ആദ്യമായാണ് സുരേഷ് ഗോപിയും മകൻ ഗോകുലും ഒരു സിനിമയിൽ ഒന്നിക്കുന്നതെന്ന പ്രത്യേകതയുമുണ്ട്.

ഡേവിഡ് കാച്ചപ്പിള്ളി പ്രൊഡക്ഷൻസിന്റെ ബാനറിൽ ഡേവിഡ് കാച്ചപ്പിള്ളി നിർമ്മിക്കുന്ന ഇൗ ചിത്രത്തിന്റെ നിർമ്മാണത്തിൽ ഇപ്പോൾ റാഫി മതിരയുടെ ഇഫാർമീഡിയ കൂടി പങ്കുചേർന്നിട്ടുണ്ട്. ആർജെ ഷാനാണ് തിരക്കഥയൊരുക്കുന്നത്. ഛായാഗ്രഹണം: അജയ് ഡേവിഡ് കാച്ചപ്പിള്ളി, സഹനിർമ്മാണം: സുജിത് ജെ നായർ, ഷാജി.

എഡിറ്റർ: ശ്യാം ശശിധരൻ, സംഗീതം: ജേക്‌സ് ബിജോയ്, സൗണ്ട് ഡിസൈൻ: വിഷ്ണു ഗോവിന്ദ്, ശ്രീശങ്കർ, ആർട്ട്: നിമേഷ് എം താനൂർ. മേക്കപ്പ്: റോണെക്‌സ് സേവ്യർ. കോസ്റ്റ്യൂം: പ്രവീൺ വർമ, പ്രൊഡക്ഷൻ കൺട്രോളർ: എസ് മുരുകൻ, ചീഫ് അസോസിയേറ്റ് ഡയറക്ടർ: സിബി ജോസ് ചാലിശ്ശേരി, സ്റ്റിൽസ്: നന്ദു ഗോപാലകൃഷ്ണൻ, ഡിസൈൻസ്: ഓൾഡ് മങ്ക്‌സ്, പി.ആർ.ഒ: വാഴൂർ ജോസ്, മഞ്ജു ഗോപിനാഥ്. ഡ്രീം ബിഗ് ഫിലിംസ് ചിത്രം തീയറ്ററുകളിൽ എത്തിക്കുന്നു.