ഓൺലൈൻ പേയ്മെന്റുകളുടെ കാലമാണ് ഇപ്പോൾ. നോട്ട് വഴി കൊവിഡ് പകരുന്നത് തടയാൻ പരമാവധി ഓൺലൈൻ പണമിടപാട് നടത്താനാണ് മിക്ക രാജ്യത്തും ജനങ്ങൾ ശ്രമിക്കുന്നത്. എന്നാൽ ഇത്തരം പണമിടപാടിന്റെ സുരക്ഷിതത്വം എത്രയെന്ന് പല ചോദ്യങ്ങളും പല അവസരങ്ങളിലും ഉയർന്നിട്ടുണ്ട്. അത്തരത്തിലൊന്നാണ് ഇപ്പോൾ ആൻഡ്രോയിഡ് ഫോൺ ഉപയോഗിക്കുന്നവ‌ർക്ക് സൈബർ സുരക്ഷാ വിദഗ്ദ്ധർ നൽകുന്ന മുന്നറിയിപ്പ്. ഒറ്റ ഫോൺകോളിൽ ബാങ്ക് അക്കൗണ്ട് മുഴുവൻ കാലിയാക്കാൻ കഴിയുന്ന ആപ്പ് ഹാക്കർമാർ ഉപയോഗിക്കുന്നതായാണ് അറിയിപ്പ്.
കഴിഞ്ഞ വർഷം ഇത്തരത്തിലുള‌ള തട്ടിപ്പുകളുടെ എണ്ണം വ‌ർദ്ധിച്ചതായി സൈബർ സുരക്ഷാ വിദഗ്ദ്ധർ ചൂണ്ടിക്കാട്ടുന്നു. റിമോട്ട് ആക്‌സെസ് ട്രോജൻ(റാറ്റ്) എന്ന ആപ്പാണ് ഇത്തരത്തിൽ ഉപയോഗിക്കുന്നത്. ഇത്തരത്തിൽ ബ്രാറ്റ(BRATA) എന്ന മാൽവെയർ പ്രോഗ്രാം ബ്രസീൽ, ലിത്വാനിയ, ഇറ്റലി,നെതർലാന്റ്സ് എന്നീ രാജ്യങ്ങളിൽ കണ്ടെത്തി. അമേരിക്കയിലോ ബ്രിട്ടണിലോ കണ്ടെത്തിയില്ലെങ്കിലും ഇവിടങ്ങളിലെയും വിദഗ്ദ്ധർ ജാഗരൂകരാണ്. ഇത് കണ്ടെത്താൻ വളരെ പ്രയാസമുള‌്ളൊരു മാൽവെയറാണ്.
ഒരു വെബ്‌സൈറ്റിലേക്കുള‌ള ലിങ്ക് മെസേജായി അയക്കും. ഇത് ബാങ്കിൽ നിന്നുള‌ളതാണെന്ന് തോന്നിപ്പിക്കും. ലിങ്കിൽ ക്ളിക്ക് ചെയ്‌താൽ ആന്റി സ്‌പാം ആപ്പ് ഡൗൺലോഡ് ചെയ്യാൻ ആവശ്യപ്പെടുന്ന സൈ‌റ്റിലെത്തും. തുടർന്ന് വ്യക്തിഗത വിവരങ്ങൾ ചോദിച്ച ശേഷം ബാങ്കിൽ നിന്നും വിളിക്കുമെന്ന് അറിയിപ്പ് വരും. തുടർന്ന് തട്ടിപ്പുകാരൻ വിളിച്ച് ആപ്പ് ഡൗൺലോഡ് ചെയ്യാൻ ആവശ്യപ്പെടും. ഇതിലൂടെ അക്കൗണ്ടിലെ പണം തട്ടാനോ സൈബർ ക്രൈം നടത്താനോ കഴിയും.
സംശയാസ്‌പദമായ ലിങ്കുകളിൽ ക്ളിക്ക് ചെയ്യാതിരുന്നാൽ ഇത്തരം കുഴപ്പങ്ങളിൽ നിന്നും രക്ഷനേടാം.സംശയം തോന്നിയാൽ ബാങ്കിലെ നമ്പരിൽ വിളിച്ച് നേരിട്ട് അന്വേഷിക്കുന്നതാണ് തട്ടിപ്പിന് ഇരയാകാതിരിക്കാൻ അഭികാമ്യം.