കൊൽക്കത്ത: ജാർഖണ്ഡിൽ നിന്നുള്ള ദേശീയ വനിതാ ഷൂട്ടിംഗ് താരം കൊണിക ലായക് സ്വയം ജീവനൊടുക്കി. 26-കാരിയായ കൊണിക കൊൽക്കത്തയിലെ ഹോസ്റ്റൽ മുറിയിൽ തൂങ്ങി മരിക്കുകയായിരുന്നു. റൈഫിൾ ഇല്ലാത്തിനാൽ ദേശീയ ചാമ്പ്യൻഷിപ്പിൽ പങ്കെടുക്കാനാവാതിരുന്ന കൊണികയ്ക്ക് ബോളിവുഡ് താരം സോനു സൂദ് 2.70 ലക്ഷം രൂപയുടെ റൈഫിൾ സമ്മാനിച്ചത് വാർത്തകളിൽ ഇടം പിടിച്ചിരുന്നു .

ഒളിമ്പ്യൻ ഷൂട്ടറായ ജോയ്ദീപ് കർമാകറുടെ അക്കാഡമിയിലാണ് കൊണിക പരിശീലനം നേടിയിരുന്നത്. സംസ്ഥാന തലത്തിൽ നാല് സ്വർണം നേടിയ താരമാണ് .ആത്മഹത്യയുടെ കാരണം പുറത്തുവന്നിട്ടില്ല. അന്വേഷണം പുരോഗമിക്കുകയാണെന്ന് പോലീസ് വ്യക്തമാക്കി.

നാല് മാസത്തിനുള്ളിൽ ആത്മഹത്യ ചെയ്യുന്ന നാലാമത്തെ ഇന്ത്യൻ ഷൂട്ടിംഗ് താരമാണ് കൊണിക.

നാല് മാസത്തിനിടയിൽ ഖുഷ് സീറത് കൗറും ഹുനർദീപ് സിംഗും നമൻവീർ സിംഗ്ബ്രാറും ആത്മഹത്യ ചെയ്തിരുന്നു. പഞ്ചാബിൽ നിന്നുള്ള 17-കാരിയായ ഖുഷ് സീറത് സ്വയം വെടിയുതിർത്ത് മരിക്കുകയായിരുന്നു. ഒക്ടോബറിൽ നടന്ന ജൂനിയർ ലോക ചാമ്പ്യൻഷിപ്പിൽ ഖുഷ് സീറത് ഇന്ത്യയെ പ്രതിനിധീകരിച്ചിരുന്നു.