തൃശൂർ: തമിഴ്നാട്ടിലെ കൂനൂരിലുണ്ടായ ഹെലികോപ്ടർ അപകടത്തിൽ മരിച്ച വ്യോമസേന ജൂനിയർ വാറണ്ട് ഓഫീസർ എ പ്രദീപിന്റെ ഭാര്യ ശ്രീലക്ഷ്മിക്ക് സർക്കാർ ജോലി നൽകുന്നതിനുള്ള നിയമന ഉത്തരവ് കൈമാറി. റവന്യൂ മന്ത്രി കെ രാജൻ പ്രദീപിന്റെ പുത്തൂരിലെ വസതിയിൽ നേരിട്ടെത്തി നിയമന ഉത്തരവ് കൈമാറുകയായിരുന്നു. റവന്യൂ വകുപ്പിലാണ് ജോലി നൽകുന്നത്. എം കോം ബിരുദധാരിയാണ് ശ്രീലക്ഷ്മി.

ശ്രീലക്ഷ്മിക്ക് വിദ്യാഭ്യാസ യോഗ്യതയ്ക്ക് അനുസരിച്ചുള്ള ജോലി നൽകുമെന്ന് കഴിഞ്ഞ ദിവസം മന്ത്രിസഭാ യോഗത്തിനുശേഷം കെ രാജൻ അറിയിച്ചിരുന്നു. പ്രദീപിന്റെ കുടുംബത്തിന് സാമ്പത്തിക സഹായമായി എട്ടു ലക്ഷം രൂപ നൽകാനും യോഗത്തിൽ തീരുമാനമായി. ഇതു സംബന്ധിച്ച ഉത്തരവും ഇന്ന് കുടുംബത്തിന് കൈമാറി. സൈനിക ക്ഷേമനിധിയിൽ നിന്ന് കുടുംബത്തിന് അഞ്ച് ലക്ഷം രൂപയും വെന്റിലേറ്ററിൽ കഴിയുന്ന പ്രദീപിന്റെ പിതാവിന്റെ ചികിത്സയ്ക്കായി മുഖ്യമന്ത്രിയുടെ ദുരിതാശ്വാസ നിധിയിൽ നിന്നും മൂന്നുലക്ഷം രൂപയുമാണ് നൽകുന്നത്.