തിരുവനന്തപുരം: റോഡിൽ അടിപൊളി ലുക്കിലൊരു ഡബിൾ ഡക്കർ ബസ് കണ്ടവർ ആദ്യം ഒന്നു ഞെട്ടി. 'ബുൾ ജെറ്റ്' സംഭവമൊക്കെ കത്തി നിൽക്കുന്ന സമയത്ത് ഇങ്ങനെ നിറങ്ങൾ വാരിയൊഴിച്ച് പടങ്ങളുമായിട്ട് ബസ് എങ്ങനെ നിരത്തുകളിലൂടെ ഓടിക്കും? മുന്നിൽ നോക്കിയപ്പോൾ കെ.എസ്.ആർ.ടി.സി എന്നെഴുതിയിട്ടുണ്ട്.

അതുശരി, കെ.എസ്.ആർ.ടി.സിക്ക് എന്തും ആകാമെന്നോ! പിന്നെ സമൂഹമാദ്ധ്യമങ്ങളിൽ നിയമം കെ.എസ്.ആർ.ടി.സി പാലിക്കുന്നില്ലേ എന്ന മട്ടിൽ എഴത്തോട് എഴുത്ത്. എല്ലാ 'പോസ്റ്റ്മാൻ'മാരുടെയും ശ്രദ്ധയ്ക്ക്: ഓടുന്നത് തിരുവനന്തപുരത്തുകാരുടെ സ്വന്തം ഡബിൾ ഡക്കർ തന്നെയാണ്. പക്ഷേ, അത് വാടകയ്ക്ക് കൊടുത്തിരിക്കുകയാണ്. ബേസിൽ ജോസഫ് സംവിധാനം ചെയ്യുന്ന ടൊവീനോ നായകനാകുന്ന 'മിന്നൽ മുരളി' എന്ന സിനിമയുടെ പ്രചാരണത്തിനു വേണ്ടിയാണ് ബസ് വാടകയ്ക്ക് നൽകിയിരിക്കുന്നത്. ബസിന്റെ നിറം മാറ്റത്തിനു വേണ്ട നിയമപരമായ അനുവാദമൊക്കെ വാങ്ങിയാണ് നിർമ്മാതാക്കൾ അതൊക്കെ ചെയ്‌തെതെന്നാണ് കെ.എസ്.ആർ.ടി.സി അധികൃതർ പറയുന്നത്. മാത്രമല്ല തിരിച്ചു തരമ്പോൾ പഴയ കോലത്തിൽ തന്നെയാക്കി തരുമെന്നും അവർ സമ്മതിച്ചിട്ടുണ്ട്.

16 മുതൽ അഞ്ച് ദിവസത്തേക്കാണ് വാടകയ്ക്ക് നൽകിയിരിക്കുന്നത്. ഒരു ദിവസം ഒരു ലക്ഷം രൂപ വച്ച് ആകെ അഞ്ച് ലക്ഷം രൂപ ലഭിക്കും. കെ.എസ്.ആർ.ടി.സിക്ക് ഇപ്പോൾ കഷ്ടകാലമാണ് അഞ്ച് ലക്ഷം കിട്ടിയാൽ ആത്രയുമായി. ഫോട്ടോ ഷൂട്ടിനും ആഘോഷങ്ങൾക്കും ടീപാർട്ടിക്കും കെ.എസ്.ആർ.ടി.സിയുടെ രണ്ട് ഡബിൾ ഡക്കർ ബസുകൾ ലഭിക്കും.