ഹൈദരാബാദ്: ഇന്ത്യയിൽ മാറ്റങ്ങൾ പ്രതിഫലിക്കുകയാണെന്നതിന് ഉത്തമ ഉദാഹരണമായി സ്വവർഗാനുരാഗികളുടെ വിവാഹത്തിന് സാക്ഷ്യം വഹിച്ച് ഹൈദരാബാദ്. കുടുംബത്തിന്റെയും അടുത്ത സുഹൃത്തുക്കളുടെയും സാന്നിദ്ധ്യത്തിൽ ഹൈദരാബാദിൽ നിന്നുള്ള ഗേ ദമ്പതിമാരാണ് വിവാഹിതരായത്. ഒരു റിസോർട്ടിൽ നടന്ന സ്വകാര്യ ചടങ്ങുകൾ ക്രമീകരിച്ചത് ഹൈദരാബാദിൽ നിന്നുതന്നെയുള്ള ട്രാൻസ്‌വെസ്‌റ്റൈറ്റായ സോഫിയ ഡേവിഡാണ്.

സുപ്രിയോ ചക്രബർത്തി (31), അബയ് ദംഗ് (34) എന്നിവരാണ് തങ്ങളുടെ എട്ടു വർഷം നീണ്ട പ്രണയത്തിനൊടുവിൽ വിവാഹിതരായത്. ബംഗാളി,പഞ്ചാബി പരമ്പരാഗത രീതിയിലായിരുന്നു ചടങ്ങുകൾ. ഒരു പ്രമുഖ ഹോട്ടൽ മാനേജ്മെന്റ് സ്ഥാപനത്തിലെ അദ്ധ്യാപകനാണ് കൊൽക്കത്ത സ്വദേശിയായ സുപ്രിയോ ചക്രബർത്തി. ആമസോണിന്റെ സീനിയർ മാനേജറാണ് ഡൽഹി സ്വദേശിയായ അബയ് ദംഗ്.

ഇന്ത്യ സാവധാനമായതും എന്നാൽ ഉറപ്പായതുമായ മാറ്റത്തിലൂടെ കടന്നുപോകുകയാണെന്നതിന് സാക്ഷിയായെന്ന് ചടങ്ങിലെ മുഖ്യാതിഥിയായ മുതിർന്ന മാദ്ധ്യമപ്രവർത്തകൻ കിംഗ്‌ഷുക് നാഗ് പറഞ്ഞു.