ഇടുക്കി: സംസ്ഥാനത്തെ മലയോരമേഖലകളിലെ വാഹനങ്ങളുടെ പെട്രോൾ പൈപ്പുകൾ ചെറുവണ്ടുകൾ തുരന്ന് ദ്വാരമുണ്ടാക്കുന്നതായി കണ്ടെത്തി. ഇങ്ങനെ ഉണ്ടാകുന്ന ചെറുദ്വാരങ്ങൾ വഴി പെട്രോൾ വൻ തോതിൽ നഷ്ടമാകുന്നതിന് പുറമേ വാഹനം തീപിടിക്കാൻ വരെ കാരണമാകുന്നുണ്ട്. പെട്രോളിലെ എഥനോളിന്റെ സാന്നിദ്ധ്യം കാരണം മരമാണെന്ന് കരുതിയാണ് വണ്ടുകൾ പെട്രോൾ പൈപ്പുകൾ തുരക്കുന്നതെന്ന് വിദഗ്‌ദ്ധർ പറഞ്ഞു,
മുപ്പതോളം വാഹനങ്ങളാണ് കേരളത്തിലെ വിവിധ സർവ്വീസ് സെന്ററുകളിൽ ഇതേ പ്രശ്നവുമായി സമീപദിവസങ്ങളിൽ എത്തിയത്. സാധാരണ ഓഗസ്റ്റ് - സെപ്തംബർ മാസങ്ങളിൽ ഇത്തരം കേസുകൾ പതിവായിരുന്നു. എന്നാൽ കഴിഞ്ഞ കുറച്ചു ദിവസങ്ങളായി വൻ തോതിൽ വാഹന ഉടമകൾ സമാന പ്രശ്നങ്ങളുമായി എത്തിയതോടെയാണ് സർവ്വീസ് സെന്റർ അധികൃതർ സംഭവം അന്വേഷിക്കാൻ തീരുമാനിച്ചത്.
വാഹനം നിർത്തിയിടുമ്പോൾ ഇന്ധനചോർച്ച ഉണ്ടാകാത്തത് കാരണം പലരും കരുതിയത് മൈലേജുമായി ബന്ധപ്പെട്ട പ്രശ്നമാണെന്നായിരുന്നു. വാഹനം സർവ്വീസ് സെന്ററിൽ കൊണ്ടുവരുന്നതും മൈലേജ് കുറയുന്നു എന്ന പരാതിയുമായാണ്. എന്നാൽ മെക്കാനിക്കുകൾ പരിശോധിക്കുമ്പോൾ മൈലേജ് കുറയാനുള്ള പ്രശ്നങ്ങളൊന്നും കണ്ടെത്താനും സാധിക്കില്ല. വാഹനം ഓടിക്കുന്നതിന്റെ പ്രശ്നമാണെന്ന് കരുതി ഉടമകൾ മടങ്ങിപോകുകയും ചെയ്യും. എന്നാൽ യഥാർത്ഥ കാരണം ഇന്ധന ചോർച്ചയാണെന്ന് മനസിലാക്കുമ്പോഴേക്കും ഏറെ വൈകിയിരിക്കും.
ഇത്തരം വാഹനം ഓടിക്കുന്നത് വലിയ അപകടത്തിന് വരെ കാരണമായേക്കുമെന്ന് മെക്കാനിക്കുകൾ പറയുന്നു. വാഹനം ഓടുമ്പോൾ ഇന്ധനചോർച്ച ഉണ്ടാകുന്നത് കാരണം പെട്ടെന്ന് ബ്രേക്ക് ചവിട്ടുമ്പോൾ ഉണ്ടാകുന്ന ചെറിയൊരു തീപ്പൊരി പോലും വലിയ അപകടത്തിന് കാരണമായേക്കും. ഇത്തരമൊരു സാഹചര്യം വാഹനത്തിനുണ്ടെന്ന് കരുതിയാൽ വർക്ക് ഷോപ്പിൽ കൊണ്ട് പോകുന്നതിന് വേണ്ടി പോലും വാഹനം സ്റ്റാർട്ട് ആക്കരുതെന്നും എത്രയും പെട്ടെന്ന് സർവ്വീസ് സെന്റിൽ ബന്ധപ്പെട്ട് മെക്കാനിക്കിനെ വീട്ടിൽ എത്തിക്കണമെന്നും അധികൃതർ പറഞ്ഞു.