കഴിഞ്ഞ ദിവസം മലയാളികളുടെ സൂപ്പർതാരം മോഹൻലാൽ ഫേസ്‌ബുക്കിൽ പോസ്റ്റ് ചെയ്‌ത ചിത്രം പലരും ശ്രദ്ധിച്ചിട്ടുണ്ടാകും. ഗോട്ടിക്കുള്ളിലൂടെ നോക്കുന്ന ലാലേട്ടന്റെ ചിത്രം വളരെ വേഗത്തിലാണ് വൈറലായത്. സംവിധായകനും സെലിബ്രിറ്റി ഫോട്ടോഗ്രാഫറുമായ അനീഷ് ഉപാസനയാണ് മനോഹരമായ ഈ ചിത്രമെടുത്തിരിക്കുന്നത്. സംഗതി വൈറൽ ആയതോടെ ആ ചിത്രം പിറന്നതിനെ കുറിച്ചും എടുക്കാനുണ്ടായ സാഹചര്യത്തെ കുറിച്ചും തുറന്നെഴുതിയിരിക്കുകയാണ് അനീഷ് ഉപാസന.

'ദേ ഗോട്ടിക്കുള്ളിൽ ഞാൻ..'
(ലൊക്കേഷൻ ബറോസ്)
വിഷ്‌ണു : അനീഷേട്ടാ ലാൽ സാർ വന്നിട്ടുണ്ട്..
ഞാൻ : ആണോ..? ശരി ക്യാമറ താ.. ഒന്ന് പുറകെ പോയി നോക്കട്ടെ.. എന്തേലും തടഞ്ഞാലോ...😎

സ്റ്റാൻഡിൽ ഉറപ്പിച്ച ക്യാമെറയെടുത്ത് സാറിന്റെ പുറകെ പോകുന്ന ഞാൻ..
ബറോസിന് വേണ്ടിയൊരുക്കിയ കൂറ്റൻ സെറ്റിനകത്ത് സഹപ്രവർത്തകർക്ക് കൃത്യമായ നിർദ്ദേശം നൽകുന്ന ലാൽ സാറിനെ ഞാൻ ക്യാമറയിൽ പകർത്താൻ തുടങ്ങി.. അല്പ നേരത്തിന് ശേഷം പുറത്തേക്കിറങ്ങിയ ലാൽ സാറിനടുത്ത് കലാസംവിധായകൻ സന്തോഷ് രാമൻ ആർട്ട് പ്രോപ്പർട്ടികൾ പലതും കാണിച്ച് തുടങ്ങി... എല്ലാം ഒന്നിനൊന്ന് മെച്ചം.. പെട്ടെന്നായിരുന്നു ഒരു ഗോട്ടി കൈയിൽ കിട്ടിയത്..
കൂടെ നിന്നവരോടായി ലാൽ സാർ : ഇത് നന്നായിട്ടുണ്ടല്ലേ.. നോക്കൂ.. ഇതിലെന്നെ കാണാം..
(കുട്ടിത്തം തുളുമ്പുന്ന ചിരി)
ഒരു കുഞ്ഞ് സംസാരിക്കുന്നത് പോലെയാണ് സാർ ആ ഗോട്ടിയെ കുറിച്ച് സംസാരിച്ചത്.. ഒരു പക്ഷേ ആ സമയത്ത് എന്നെ ക്യാമെറയെടുക്കാൻ പ്രേരിപ്പിച്ചതും ആ വാക്കുകളാവാം..
ഈ ഒറ്റ ഫോട്ടോ മാത്രമേ എനിക്കെടുക്കാൻ കഴിഞ്ഞുള്ളു.. അതിനുള്ളിൽ സാർ മുഖത്ത് നിന്നും ഗോട്ടി മാറ്റിയിരുന്നു...
ക്യാമറ കൈയിലെടുത്തപ്പോൾ തന്നെ മനസിൽ കുറിച്ചതാണ് ആ ഗോട്ടിയിൽ സാറിന്റെ മുഖം പതിയണമെന്ന്...
പതിഞ്ഞു.. ❤️

മനസിൽ കണ്ട ചിത്രം മനസിനേക്കാൾ വേഗതയിൽ ക്യാമറയിൽ പകർത്തിയതിന്റെ സന്തോഷത്തിലാണ് ഞാൻ ❤️ ഇപ്പൊ സാറിന്റെ വാട്‌സാപ്പ് ഡിപി ആണ് ഈ ചിത്രം."