വാഷിംഗ്ടൺ : കൊവിഡ് പ്രതിരോധ ഗുളികകൾക്ക് അംഗീകാരം നല്കി യു.എസ്. ഫൈസറിന്റെ ഗുളികയായ പാക്‌സ്ലോവിഡിനും മെർക്ക് എന്ന കമ്പനിയുടെ മോൽനുപിറാവിൽ ഗുളികയ്ക്കുമാണ് യു.എസ് ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ( എഫ്.ഡി.എ )​അംഗീകാരം നൽകിയത്. രാജ്യത്ത് ഒമിക്രോൺ മൂലം കേസുകൾ പ്രതിദിനം വർദ്ധിച്ചു വരുന്ന സാഹചര്യത്തിലാണ് ഈ മരുന്നുകൾ ഉപയോഗിക്കാൻ എഫ്.ഡി.എ അനുമതി നല്കിയത്. ഹൈ റിസ്ക് വിഭാഗത്തിലുള്ള 12 വയസിന് മുകളിലുള്ളവർക്കാണ് പാക്‌സ്ലോവിഡ് ഉപയോഗിക്കാൻ അനുമതി നല്കിയിട്ടുള്ളത്. ക്ലിനിക്കൽ പരീക്ഷണങ്ങളുടെ അടിസ്ഥാനത്തിൽ,​ ഹൈ റിസ്ക് വിഭാഗത്തിലുള്ള രോഗികളിൽ ആശുപത്രിവാസവും മരണവും 88 ശതമാനം വരെ കുറയ്ക്കാൻ പാക്‌സ്ലോവിഡിന് കഴിയുമെന്ന് കണ്ടെത്തിയെന്ന് യു.എസ് ഫുഡ് ആൻഡ് ഡ്രഗ് അഡ്മിനിസ്‌ട്രേഷന്റെ ഗവേഷണ വിഭാഗം ഡയറക്ടറായ പാട്രീസിയ കാവസോണി വ്യക്തമാക്കി.എന്നാൽ ഈ ഗുളികയെ ഒരിക്കലും വാക്സിന് പകരമായി കാണരുതെന്നും അത് ഗുണത്തേക്കാളേറെ ദോഷം ചെയ്യുമെന്നും എഫ്.ഡി.എ മുന്നറിയിപ്പ് നല്കി. മെർക്കിന്റെ മോൽനുപിറാവിൽ ഗുളിക റിഡ്ജ്ബാക്ക് ബയോതെറാപ്പിറ്റിക്സ് ആണ് വികസിപ്പിച്ചെടുത്തത്. ഹൈ റിസ്ക് രോഗികളിൽ ആശുപത്രിവാസവും മരണവും 30 ശതമാനത്തോളം കുറയ്ക്കാൻ ഈ മരുന്നിന് സാധിച്ചതായി ക്ലിനിക്കൽ ട്രയലിൽ കണ്ടെത്തിയിരുന്നു.18 വയസ്സിന് താഴെയുള്ളവരിൽ ഈ മരുന്ന് ഉപയോഗിക്കുന്നതിന് അനുമതിയില്ല. മോൽനുപിറാവിൽ എല്ലുകളുടെ വളർച്ചയെ ബാധിക്കാനുള്ള സാദ്ധ്യതയുണ്ടെന്ന് എഫ്.ഡി.എ മുന്നറിയിപ്പ് നല്കിയിട്ടുണ്ട്. ഗർഭിണികൾ ഈ മരുന്ന് ഉപയോഗിക്കരുതെന്നും നിർദ്ദേശമുണ്ട്.

അതേ സമയം പുതിയ ചികിത്സാ രീതിയെന്ന നിലയിൽ ഈ ഗുളികകൾക്ക് അടിയന്തര ഉപയോഗത്തിന് അനുമതി ലഭിച്ചത് ഏറെ പ്രതീക്ഷ നൽകുന്നുവെന്ന് യു.എസ് പ്രസിഡന്റ് ജോ ബൈഡൻ പ്രതികരിച്ചു. ഗുളികളുടെ നിർമ്മാണം വേഗത്തിലാക്കാൻ വേണ്ട എല്ലാ സഹായവും കമ്പനികൾക്ക് യു.എസ് സർക്കാരിൽ നിന്ന് പ്രതീക്ഷിക്കാമെന്നും അദ്ദേഹം കൂട്ടിച്ചേർത്തു.