കണ്ണൂർ: വഖഫ് വിഷയത്തിൽ മുസ്ലീം ലീഗിനെതിരെ രൂക്ഷവിമർശനവുമായി മുഖ്യമന്ത്രി പിണറായി വിജയൻ. മുസ്ലീം ലീഗ് സമൂഹത്തിൽ വർഗ്ഗീയത ഉണ്ടാക്കാനുള്ള ശ്രമം നടത്തുകയാണ്. വഖഫ് വിഷയത്തിൽ ഉൾപ്പെടെ ഇതാണ് നാം കണ്ടതെന്നും മുഖ്യമന്ത്രി പറഞ്ഞു.

കേരളത്തിലെ എൽഡിഎഫ് സർക്കാരിന്റെ കീഴിൽ മുസ്ലീങ്ങൾക്ക് രക്ഷയില്ല എന്ന് വരുത്തിതീർക്കാനുള്ള ശ്രമമാണ് ലീഗ് നടത്തുന്നത്. വഖഫ് വിഷയത്തിൽ സർക്കാരിന് പിടിവാശിയില്ല. അതുകൊണ്ട് തന്നെയാണ് വിശദമായ ചർച്ചക്ക് ശേഷം കാര്യങ്ങൾ മുന്നോട്ട് പോയാൽമതിയെന്ന് തീരുമാനിച്ചത്. സമസ്തയിലെ രണ്ട് വിഭാഗവും മുജാഹിദിലെ ഒരു വിഭാഗവും ഇതിനെ അംഗീകരിച്ചു. പക്ഷെ ലീഗിന് അംഗീകരിക്കാൻ കഴിയുന്നില്ലെന്നും മുഖ്യമന്ത്രി പറഞ്ഞു.

ലീഗിന്റെ സമ്മേളനത്തിൽ വികാരം പ്രകടിപ്പിക്കാൻ എന്ന് പറഞ്ഞ് എത്തിയവർ വിളിച്ച മുദ്രാവാക്യങ്ങൾ നിങ്ങൾ കേട്ടില്ലേ എന്നും അദ്ദേഹം ചോദിച്ചു.