മലപ്പുറം: സഹോദരൻ പീഡിപ്പിച്ചതായ പ്രായപൂര്‍ത്തിയാകാത്ത പെണ്‍കുട്ടി നൽകിയ പരാതിയിൽ നടത്തിയ അന്വേഷണത്തിനൊടുവിൽ വൻ ട്വിസ്റ്റ്. പ്രായപൂര്‍ത്തിയാകാത്ത തന്നെ സഹോദരന്‍ നിരവധി തവണ ശാരീരികമായി പീഡിപ്പിച്ചുവെന്നാണ് പെണ്‍കുട്ടി ചങ്ങരംകുളം പൊലീസിന് നല്‍കിയ പരാതിയില്‍ പറയുന്നത്. ചങ്ങരംകുളം സി.ഐ ബഷീര്‍ ചിറക്കലിന്റെ നേതൃത്വത്തിലായിരുന്നു അന്വേഷണം. പെൺകുട്ടിയുടെ മൊഴികളിൽ സംശയം തോന്നിയതിനെ തുടർന്ന് നടത്തിയ ചോദ്യം ചെയ്യലിലാണ് സത്യം തെളിഞ്ഞത്.
സ്‌കൂള്‍ വിദ്യാര്‍ത്ഥിിയായ പെണ്‍കുട്ടിക്ക് ഓണ്‍ലൈന്‍ ക്ലാസില്‍ പങ്കെടുക്കുന്നതിനായാണ് സഹോദരന്‍ മൊബൈല്‍ ഫോണ്‍ വാങ്ങി നല്‍കിയത്. എന്നാല്‍ പെൺകുട്ടി ഫോൺ ഉപയോഗിച്ച് സോഷ്യൽ മീഡിയയിലൂടെ സൗഹൃദങ്ങൾ സ്ഥാപിക്കുകയായിരുന്നു. ഇത് ഇഷ്ടമാകാത്ത സഹോദരൻ പെണ്‍കുട്ടിയെ ശകാരിക്കുകയും തുടര്‍ന്ന് വീട്ടുകാര്‍ മൊബൈല്‍ ഫോണ്‍ ഉപയോഗം തടയുകയും ചെയ്തു. ഇതാണ് സഹോദരനെതിരെ വ്യാജ പീഡന പരാതിയുമായി ചൈൽഡ് ലൈനിനെ സമീപിക്കാൻ പെൺകുട്ടിയെ പ്രേരിപ്പിച്ചത്.