ഇടുക്കി : ആർ.എസ്.എസ് പ്രവർത്തകരെക്കുറിച്ചുള്ള വിവരങ്ങൾ എസ്‌.ഡി.പി.ഐക്കാരന് ചോർത്തി നൽകിയ പൊലീസുകാരന് സസ്പെൻഷൻ. കരിമണ്ണൂർ സ്റ്റേഷനിലെ സി പി ഒ അനസിനെയാണ് ജില്ലാ പൊലീസ് മേധാവി അന്വേഷണാടിസ്ഥാനത്തിൽ സസ്പെൻഡ് ചെയ്തത്.

കരുതൽ നടപടികളുടെ ഭാഗമായി പൊലീസ് ശേഖരിച്ച ആർ.എസ്.എസ് പ്രവർത്തകരുടെ വിവരങ്ങൾ ഇയാൾ എസ്.ഡി.പി.ഐ പ്രവർത്തകർക്ക് ചോർത്തി നൽകുകയായിരുന്നുവെന്നാണ് കണ്ടെത്തൽ. മറ്റൊരു കേസിൽ അറസ്റ്റിലായ എസ്.ഡി.പി.ഐക്കാരനാണ് അനസ് പൊലീസ് ഡാറ്റാ ബേസിൽ നിന്ന് വിവരം ചോർത്തി നൽകിയെന്ന് ആദ്യം വെളിപ്പെടുത്തിയത്. ഇതിന്റെ അടിസ്ഥാനത്തിൽ തൊടുപുഴ ഡിവൈ.എസ്.പി അന്വേഷണം നടത്തുകയും അനസ് കുറ്റക്കാരനെന്ന് കണ്ടെത്തുകയുമായിരുന്നു. ഡിവൈ.എസ്.പിയുടെ റിപ്പോർട്ടിന്റെ അടിസ്ഥാനത്തിലാണ് ജില്ലാ പൊലീസ് മേധാവി അനസിനെ സസ്പെൻഡ് ചെയ്തത്.