വിജയവാഡ: 2024ൽ നടക്കുന്ന നിയമസഭ തിരഞ്ഞെടുപ്പിൽ ഒരു കോടി വോട്ട് നൽകി വിജയിപ്പിച്ചാൽ ആന്ധ്രാപ്രദേശിൽ മദ്യത്തിന് വിലകുറച്ച് നൽകാമെന്ന് ബി.ജെ.പി. ചൊവ്വാഴ്ച വിജയവാഡയിൽ നടന്ന യോഗത്തിൽ ആന്ധ്രാപ്രദേശ് ബി.ജെ.പി അദ്ധ്യക്ഷൻ സോമു വീർരാജുവാണ് പ്രഖ്യാപനം നടത്തിയത്.

ബി.ജെ.പി വിജയിച്ചാൽ 70 രൂപക്ക്​ മദ്യം നൽകും. കൂടുതൽ വോട്ട് ലഭിച്ചാൽ 200 രൂപയുടെ ബോട്ടിൽ മദ്യം 50 രൂപയ്ക്ക് നൽകുമെന്നും വീർരാജു പറഞ്ഞു. നിലവിൽ സംസ്ഥാനത്ത് ഒരു ക്വാർട്ടർ കുപ്പി മദ്യത്തിന് 200 രൂപയാണ്,​ സംസ്ഥാന സർക്കാർ വിൽക്കുന്നത് നിലവാരമില്ലാത്ത വ്യാജ ബ്രാൻഡുകളാണ്. നിലവാരമുള്ള പല ബ്രാൻഡും സംസ്ഥാനത്ത് ലഭിക്കുന്നില്ല. ഞങ്ങൾ അധികാരത്തിലേറിയാൽ ഏറ്റവും നല്ല മദ്യം നൽകുമെന്നും അദ്ദേഹം കൂട്ടിച്ചേർത്തു.