തിരുവനന്തപുരം:സമൂഹത്തിൽ വ‌ർദ്ധിച്ചു വരുന്ന സ്ത്രീധന പീഡങ്ങൾക്കെതിരെ പേട്ട ഗവ.ഗേൾസ് സ്കൂളിലെ എൻ.എസ്.എസ് യൂണിറ്റിന്റെ നേതൃത്വത്തിൽ വിദ്യാർത്ഥിനികൾ അവതരിപ്പിച്ച തെരുവ് നാടകം ശ്രദ്ധേയമായി. നാഷണൽ സർവീസ് സ്കീമിന്റെ സപ്തദിന ക്യാമ്പുമായി സഹകരിച്ച് വനിത ശിശുവികസന വകുപ്പ് നടത്തി വരുന്ന സമജീവനം പദ്ധതിയുടെ ഭാഗമായാണ് കനൽപൊട്ട് എന്ന തെരുവ് നാടകം അവതരിപ്പിച്ചത്. തുടക്ക നാടകമാണ് ഇന്നലെ പേട്ട കെ പങ്കജാക്ഷൻ ഓപ്പൺ ഓഡിറ്റോറിയത്തിലും ,പള്ളിമുക്ക് ജംഗ്ഷനിലും അരങ്ങേറിയത്.
ആറംഗ സംഘത്തിന്റെ നാടകത്തിലൂടെ സ്ത്രീധനത്തിനെതിരെ മികച്ച ഒരു സന്ദേശമാണ് നൽകുന്നത്. വരും ദിവസങ്ങളിൽ സ്കൂളിന്റെ പരിസരത്തുള്ള സ്ഥലങ്ങളിൽ ഈ സന്ദേശമുയർത്തി വിദ്യാർത്ഥികൾ നാടകം അവതരിപ്പിക്കും. ഇത് കൂടാതെ എൻ.എസ്.എസിന്റെ ആഭിമുഖ്യത്തിൽ വാർഷിക സപ്തദിന ക്യാമ്പിന്റെ ഭാഗമായി മെഡിക്കൽ ക്യാമ്പും ലഹരിവിരുദ്ധ ബോധവത്കരണ പരിപാടികളും സംഘടിപ്പിച്ചിട്ടുണ്ട്. അപർണ വിജയ്,ഗ്രീഷ്മ,വൈഷണവി,നാസില,അക്ഷര,മാളവിക,ശിവാനി,അന്നാ രാജ്,അനുജി എന്നീ വിദ്യാർത്ഥികളാണ് നാടകം അവതരിപ്പിച്ചത്. സ്കൂൾ പ്രിൻസിപ്പൽ ഡോ.സുമ.കെ.എസ്, പ്രോഗ്രാം ഓഫീസർ മായാദേവി.ജി, അദ്ധ്യാപിക ലീന കുമാരി വി.ജി എന്നിവരും നാടകത്തിന് നേതൃത്വം നൽകി.