പൊന്നാനി: തുറമുഖ പ്രദേശത്ത് നിന്ന് കോടികൾ വിലവരുന്ന 30,000 ടൺ മണൽ കാണാതായ സംഭവത്തിൽ ഉദ്യോഗസ്ഥ രാഷ്ട്രീയ ബന്ധം അന്വേഷിക്കണമെന്നാവശ്യപ്പെട്ട് പൊന്നാനി നിയോജക മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ മാർച്ച് നടത്തി. സമാപന പൊതുയോഗം കെപിസിസി വർക്കിംഗ് പ്രസിഡന്റ് ടി.സിദ്ദിഖ് എം.എൽ.എ ഉദ്ഘാടനം ചെയ്തു. കാണാതായ ഉപ്പ് കലർന്ന മണൽ ഉപയോഗിച്ച് കെട്ടിടം നിർമ്മിച്ചാൽ തകർന്നു വീഴുവാൻ സാദ്ധ്യതയുള്ളതിനാൽ മണൽ എവിടെപ്പോയി എന്ന് പോലീസ് കണ്ടുപിടിക്കണമെന്നും, തുറമുഖ വകുപ്പിന്റെ പാസ് ഇല്ലാതെ മണൽ എങ്ങനെ പുറത്തു പോയി എന്നതിനെ പറ്റി അന്വേഷണം നടത്തണമെന്നും സ്ഥലം എം.എൽ.എ മണൽ വിഷയം നിയമസഭയിൽ ഉന്നയിക്കാൻ ധൈര്യം കാണിക്കണമെന്നും ടി.സിദ്ദിഖ് ആവശ്യപ്പെട്ടു.

ബ്ലോക്ക് പ്രസിഡന്റ് മുസ്തഫ വടമുക്ക് അദ്ധ്യക്ഷത വഹിച്ചു. ഡി.സി.സി പ്രസിഡന്റ് വി.എസ് ജോയ്, പി.ടി അജയ്‌മോഹൻ, സി.ഹരിദാസ്, വി .സയ്ദ് മുഹമ്മദ് തങ്ങൾ, എം.വി.ശ്രീധരൻമാസ്റ്റർ, എ.എം രോഹിത്ത്, സിദ്ദീഖ് പന്താവൂർ, ടി.കെ അഷ്രഫ്, കെ.എം അനന്തകൃഷ്ണൻ മാസ്റ്റർ, എ.പവിത്ര കുമാർ, ഉണ്ണികൃഷ്ണൻ പൊന്നാനി,കെ ശിവരാമൻ സംസാരിച്ചു. പ്രതിഷേധ മാർച്ചിന് എം.അബ്ദുൽ ലത്തീഫ്, എൻ.പി.നബീൽ, ഷംസു കല്ലാട്ടയിൽ, പുന്നക്കൽസുരേഷ്, വി.ചന്ദ്രവല്ലി നേതൃത്വം നൽകി.