റാന്നി: വടശേരിക്കര-ചിറ്റാർ റോഡിലുണ്ടായ വാഹനാപകടത്തിൽ ചുമട്ടു തൊഴിലാളിക്ക് ദാരുണാന്ത്യം. പേഴുംപാറ പത്താം ബ്ലോക്ക് പടവുപുരയ്‌ക്കൽ ദേവസ്യ ആന്റണി (ജോർജ് 57)ആണ് മരിച്ചത്. ഇന്നലെ വൈകിട്ട് ഏഴുമണിയോടെ വടശേരിക്കര മലങ്കര കത്തോലിക്കാ പള്ളിക്ക് സമീപം അമിതവേഗത്തിലെത്തിയ ഓട്ടോറിക്ഷ സ്‌കൂട്ടറിൽ സഞ്ചരിക്കുകയായിരുന്ന ദേവസ്യ ആന്റണിയെയും ഭാര്യയെയും റോഡിലേക്ക് ഇടിച്ചിടുകയായിരുന്നു. പിന്നാലെ എത്തിയ തടികയറ്റിയ ലോറിയുടെ ചക്രങ്ങൾ തലയിൽ കയറിയിറങ്ങി ദേവസ്യ തൽക്ഷണം മരിച്ചു.റോഡിലേക്ക് തെറിച്ചുവീണ ഭാര്യ ആശ ജോർജ് ലോറി ഡ്രൈവറുടെ സമയോചിതമായ ഇടപെടൽ മൂലം അത്ഭുതകരമായി രക്ഷപ്പെട്ടു. സ്‌കൂട്ടറിലിടിച്ച ഓട്ടോറിക്ഷ നിറുത്താതെ പോയി.വടശേരിക്കര ബൗണ്ടറി മേഖലയിലെ ചുമട്,കയറ്റിറക്ക് തൊഴിലാളിയായ ദേവസ്യ ജോലി കഴിഞ്ഞു വീട്ടുസാധനങ്ങൾ വാങ്ങാനായി ഭാര്യയോടൊത്ത് വടശേരിക്കരയിലേക്ക് പോകുമ്പോഴായിരുന്നു അപകടം. പെരുനാട് പൊലീസ് മേൽനടപടികൾ സ്വീകരിച്ചു.