ചെങ്ങന്നൂർ : പുരോഗമനപരമായ മുന്നേറ്റത്തിന്റെ ചാലക ശക്തിയായിരുന്നു ശ്രീനാരായണ ഗുരുദേവനെന്ന് മന്ത്രി സജി ചെറിയാൻ പറഞ്ഞു. എസ്.എൻ.ഡി.പി യോഗം ചെങ്ങന്നൂർ .യൂണിയനിലെ 2801ാം നമ്പർ പെരിങ്ങാല നോർത്ത് ശാഖാ യൂത്ത്മൂവ്‌മെന്റ് സംഘടിപ്പിച്ച ഒന്നാമത് പെരിങ്ങാല ശ്രീനാരായണ കൺവെൻഷൻ ഉദ്ഘാടനം ചെയ്യുകയായിരുന്നു അദ്ദേഹം. ശ്രീ നാരായണ ഗുരുവിന്റെ പ്രസക്തി കൂടുതൽ ശക്തിപ്പെടുന്ന കാലത്താണ് നാം ജീവിക്കുന്നത്. മനുഷ്യന്റെ സ്വാതന്ത്ര്യത്തിനും വളർച്ചയ്ക്കും മുന്നേറ്റത്തിനും വേണ്ടി വാക്കിലും പ്രവൃത്തിയിലും മാതൃകാപരമായി പ്രവർത്തിച്ച സന്യാസിവര്യനാണ് ശ്രീനാരായണ ഗുരുദേവൻ. മാനവികതയാണ് ഗുരുവിന്റെ ആദർശം. നമുക്ക് ജാതിയില്ല എന്ന വിളംബരം ഏറെ ചർച്ച ചെയ്യപ്പെടണം. ജാതിയുടെ മതിൽക്കെട്ടുകൾക്കപ്പുറം മനുഷ്യ സ്‌നേഹത്തിന്റെ മഹിമയെപ്പറ്റിയാണ് അദ്ദേഹം നിരന്തരം ഉദ്‌ബോധിപ്പിച്ചത്. ശ്രീ നാരായണ ഗുരുവിന്റെ ജീവിതം പുതുതലമുറ പഠിക്കുകയും മാതൃകയാക്കുകയും ചെയ്യണമെന്ന് സജി ചെറിയാൻ പറഞ്ഞു.
യൂണിയൻ അഡ്.കമ്മിറ്റി അംഗം അനിൽ അമ്പാടി അദ്ധ്യക്ഷത വഹിച്ചു. അഡ്.കമ്മിറ്റി അംഗങ്ങളായ ബി.ജയപ്രകാശ് തൊട്ടാവാടി, എസ്.ദേവരാജൻ, റീന അനിൽ, ശാഖാ വൈസ് പ്രസിഡന്റ് സുധീഷ്, സെക്രട്ടറി സുധാ വിജയൻ എന്നിവർ പ്രസംഗിച്ചു.
യൂണിയൻ കൺവീനർ അനിൽ പി. ശ്രീരംഗം സ്വാഗതവും ശാഖാ പ്രസിഡന്റ് അരുൺ തമ്പി നന്ദിയും പറഞ്ഞു.