പത്തനംതിട്ട: മണ്ഡലപൂജയ്ക്ക് ശബരിമല അയ്യപ്പസ്വാമിക്ക് ചാർത്താനുള്ള തങ്ക അങ്കിയും വഹിച്ചുകൊണ്ടുള്ള ഘോഷയാത്ര ഇന്നലെ രാവിലെ ഏഴിന് ആറന്മുള ശ്രീപാർത്ഥസാരഥി ക്ഷേത്രത്തിൽ നിന്ന് പുറപ്പെട്ടു. രാവിലെ അഞ്ചു മുതൽ ഏഴുവരെ ആറന്മുള ക്ഷേത്രാങ്കണത്തിൽ തങ്ക അങ്കി ദർശിക്കാൻ നാടിന്റെ നാനാഭാഗങ്ങളിൽ നിന്ന് ഭക്തർ എത്തിയിരുന്നു. തങ്ക അങ്കി ഘോഷയാത്രയെ യാത്ര അയയ്ക്കാൻ അഡ്വ. പ്രമോദ് നാരായൺ എം.എൽ.എ, ദേവസ്വം ബോർഡ് പ്രസിഡന്റ് അഡ്വ. കെ. അനന്തഗോപൻ, ജില്ലാ കളക്ടർ ഡോ. ദിവ്യ എസ്. അയ്യർ, ദേവസ്വം ബോർഡ് അംഗം പി.എം. തങ്കപ്പൻ, എ. പദ്മകുമാർ, ദേവസ്വം ഡെപ്യൂട്ടി കമ്മിഷണർ ജി. ബൈജു, തിരുവാഭരണ കമ്മിഷണർ എസ്. അജിത്കുമാർ എന്നിവർ എത്തിയിരുന്നു. പത്തനംതിട്ട എ.ആർ. ക്യാമ്പ് അസി. കമാൻഡന്റ് സന്തോഷ്‌കുമാറിന്റെ നേതൃത്വത്തിൽ 60 അംഗ സായുധസംഘവും കെ. സൈനുരാജ്, ജി. അരുൺകുമാർ എന്നിവരുടെ നേതൃത്വത്തിലുള്ള ദേവസ്വം ബോർഡ് ഉദ്യോഗസ്ഥ സംഘവും ഘോഷയാത്രയെ അനുഗമിക്കുന്നുണ്ട്.
ഘോഷയാത്ര 25ന് പമ്പയിലെത്തും. അന്ന് വൈകിട്ട് 6.30ന് വിഗ്രഹത്തിൽ തങ്ക അങ്കി ചാർത്തി ദീപാരാധന നടക്കും. 26ന് ഉച്ചയ്ക്കാണ് മണ്ഡലപൂജ. തിരുവിതാംകൂർ മഹാരാജാവ് ശബരിമല അയ്യപ്പസ്വാമിക്ക് മണ്ഡല പൂജയ്ക്ക് ചാർത്താനായി നടയ്ക്കുവച്ചതാണ് തങ്ക അങ്കി.