.ശബരിമല: തങ്കഅങ്കി ഘോഷയാത്ര കടന്നുപോകുന്ന സ്ഥലങ്ങളിൽ ഇന്ന് ഗതാഗതത്തിന് നിയന്ത്രണമുണ്ടാകുമെന്ന് പമ്പ പൊലീസ് സ്‌പെഷൽ ഓഫീസർ അജിത് കുമാർ അറിയിച്ചു.
ഇന്ന് രാവിലെ 11.30നാണ് ഘോഷയാത്ര നിലയ്ക്കലിൽ എത്തുക. നിലയ്ക്കലിൽ നിന്ന് പുറപ്പെട്ട് പമ്പയിലെത്തുന്നതുവരെ നിലയ്ക്കൽ മുതൽ പമ്പ വരെയും തിരിച്ചും വാഹന ഗതാഗതത്തിന് നിയന്ത്രണമുണ്ടാകും. പന്ത്രണ്ടരയോടെയേ വാഹനങ്ങൾ കടത്തിവിടു. പമ്പയിൽ നിന്ന് തങ്കഅങ്കി ഘോഷയാത്ര സന്നിധാനത്തേക്ക് തിരിക്കുന്നത് വൈകിട്ട് മൂന്നിനാണ്. 3 മുതൽ 3.30 വരെ പമ്പയിൽ നിന്ന് സന്നിധാനത്തേക്ക് തീർത്ഥാടകരെ പ്രവേശിപ്പിക്കില്ല. തങ്കഅങ്കി ഘോഷയാത്ര നീലിമലയിലെത്തുന്നതോടെ തീർത്ഥാടകർക്ക് പ്രവേശനത്തിന് അനുമതി നൽകും. 26ന് രാത്രി പത്തിനാണ് നടയടയ്ക്കുക അന്ന് വൈകിട്ട് നാല് മുതൽ നിലയ്ക്കലിൽ നിന്ന് തീർത്ഥാടകരെ സന്നിധാനത്തേക്ക് പ്രവേശിപ്പിക്കില്ല.