ചവറ: മൂന്നുവർഷം മുമ്പുണ്ടായ അപകടത്തിൽ കഴുത്തിനും നട്ടെല്ലിനും ക്ഷതമേറ്റ് ചലനശേഷി നഷ്ടപ്പെട്ട് കിടപ്പിലായ യുവാവിന് സഹായവുമായി ചവറ ബ്ലോക്ക്‌ പഞ്ചായത്ത്‌. ചവറ മേനാമ്പള്ളി മുറിയിൽ പാറ്റൂർ പടിഞ്ഞാറ്റതിൽ ബിജുവിനാണ് ചവറ ബ്ലോക്ക് പഞ്ചായത്തിന്റെ നേതൃത്വത്തിൽ വീടുവയ്ക്കാൻ സഹായമെത്തിച്ചത്. 2021-22 സാമ്പത്തിക വർഷത്തെ പി.എം.എ.വൈ ഭവന പദ്ധതിയിൽ ഉൾപ്പെടുത്തി ഭവന നിർമ്മാണത്തിന്റെ ആദ്യ ഗഡു ബ്ലോക്ക് പഞ്ചായത്ത് പ്രസിഡന്റ് സന്തോഷ് തുപ്പാശ്ശേരി ബിജുവിന് കൈമാറി. ചവറ പഞ്ചായത്ത് പ്രസിഡന്റ് എസ്. തുളസീധരൻ പിള്ള,​ ബ്ലോക്ക് പഞ്ചായത്ത് വൈസ് പ്രസിഡന്റ് സോഫിയ,​ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ എം. പ്രസന്നൻ ഉണ്ണിത്താൻ,​ പഞ്ചായത്ത് അംഗങ്ങളായ ഷാജി എസ്. പള്ളിപ്പാടൻ,​ ആർ. ജിജി, പ്രിയ ഷിനു, ടി. ശോഭിത, സെക്രട്ടറി ശിവകുമാർ, എക്സ്റ്റൻഷൻ ഓഫീസർ ജിപ്സൺ, വി.ഇ.ഒമാരായ ജിനു,​ ദിവ്യ എന്നിവർ പങ്കെടുത്തു.