കൊല്ലം: വൃശ്ചിക വിളക്കിനോടനുബന്ധിച്ച് കഞ്ഞിസദ്യ നടത്തുന്നതിനിടെ ഭക്തിഗാനത്തിന് പകരം സിനിമാ ഗാനം കേൾപ്പിക്കാൻ ആവശ്യപ്പെട്ടത് നിരസിച്ചതിനെ തുടർന്ന് അച്ഛനെയും മകനെയും കുത്തി പരിക്കേൽപ്പിച്ച യുവാവ് അഞ്ചാലുംമൂട് പൊലീസിന്റെ പിടിയിലായി. പനയം ചോനംചിറ ബാബു ഭവനിൽ ബൈജുവാണ് (37) പിടിയി​ലായത്. കഴിഞ്ഞദിവസം പനയത്തായിരുന്നു സംഭവം. അയ്യപ്പഭക്തിഗാനം മാ​റ്റി സിനിമാ ഗാനം ഇടാൻ ഇയാൾ ആവശ്യപ്പെടുകയായിരുന്നു. ഇത് വിസമ്മതിച്ച, കമ്മി​റ്റി ചുമതലക്കാരനായ സുജിത്തിനെ ഇയാൾ സോഡ കുപ്പി ഉടച്ച് കുത്തുകയായിരുന്നു. തടസം പിടിക്കാനെത്തിയ സുജിത്തിന്റെ പിതാവിനെയും കുത്തി പരിക്കേൽപ്പിച്ചു. അഞ്ചാലുംമൂട് ഇൻസ്‌പെക്ടർ സി. ദേവരാജന്റെ നേതൃത്വത്തിൽ സബ് ഇൻസ്‌പെക്ടർമാരായ ശ്യാം, ഹരികുമാർ, സിറാജുദ്ദീൻ, സി.പി.ഒ സുനിൽ എന്നിവരടങ്ങിയ സംഘമാണ് ഇയാളെ പിടികൂടിയത്.