പാവറട്ടി: നിർമ്മാണം പാതിവഴിയിലായ എളവള്ളി ഗവ. ഹയർ സെക്കൻഡറി സ്‌കൂളിലെ പണികൾ പുനരാരംഭിച്ചു. മൂന്നു വർഷം മുമ്പാണ് സ്‌കൂൾ കെട്ടിടത്തിന്റെ നിർമ്മാണം തുടങ്ങിയത്. ഇരുനില കെട്ടിടത്തിന്റെ താഴെയുള്ള മൂന്നു മുറികളുടെ വാർപ്പ് മാത്രമാണ് പൂർത്തിയായിരുന്നത്.
മറ്റ് മൂന്നു മുറികളുടെ ചുമർ പണിയും കഴിഞ്ഞിരുന്നു. നിർമ്മാണ അപാകതകൾ പരിഹരിക്കണമെന്ന എൻജിനിയർമാരുടെ നിർദ്ദേശം കരാറുകാരൻ അനുസരിക്കാതെ വന്നതോടെയാണ് നിർമ്മാണം നിറുത്തിവയ്ക്കാൻ കത്തു നൽകിയത്.
മുരളി പെരുനെല്ലി എം.എൽ.എയുടെ ആസ്തി വികസന ഫണ്ടിൽ നിന്നും 85 ലക്ഷം രൂപ ചെലവിട്ടാണ് കെട്ടിടം നിർമ്മിക്കുന്നത്. എം.എൽ.എയുടെ അദ്ധ്യക്ഷതയിൽ ചേർന്ന അവലോകന യോഗത്തിൽ പ്രശ്‌നം ചർച്ച ചെയ്തിരുന്നു. അതേത്തുടർന്ന് എളവള്ളി പഞ്ചായത്ത് പ്രസിഡന്റ് ജിയോ ഫോക്‌സ് ആലപ്പുഴ സ്വദേശിയായ കരാറുകാരനെ അടിയന്തരമായി വിളിച്ചുവരുത്തി ധാരണ ഉണ്ടാക്കിയിരുന്നു.

ധാരണയുടെ അടിസ്ഥാനത്തിൽ നിലവിൽ പ്രവൃത്തിക്കായി നിശ്ചയിക്കപ്പെട്ട സമയം നീട്ടി നൽകി. തുടർന്നാണ് വാർപ്പ് പൂർത്തീകരിച്ചത്. വാർപ്പിനു ശേഷം പാർട്ടി ബിൽ സമർപ്പിക്കും. മൂന്നു മാസംകൊണ്ട് കെട്ടിടത്തിന്റെ പണി പൂർത്തീകരിക്കും. കെട്ടിടത്തിന്റെ നിർമ്മാണ അപാകതകൾ തൃശൂർ എൻജിനിയറിംഗ് കോളേജിലെ നിർദേശിക്കുന്ന തരത്തിൽ പരിഹരിക്കാനും ധാരണയായിരുന്നു.