എറിയാട് പഞ്ചായത്തിൽ നിർമ്മാണം പൂർത്തിയായ വീട്.

കൊടുങ്ങല്ലൂർ: സഹപാഠിയായ വിദ്യാർത്ഥിയ്ക്ക് വീട് നിർമ്മിച്ച് നൽകി ശ്രീനാരായണപുരം പി. വെമ്പല്ലൂർ എം.ഇ.എസ് ഹയർ സെക്കൻഡറി സ്‌കൂൾ നാഷണൽ സർവീസ് സ്‌കീം യൂണിറ്റ്. എൻ.എസ്.എസിന്റെ 'തണൽ സനേഹ ഭവനം' പദ്ധതിയിലൂടെയാണ് വീട് നിർമ്മിച്ച് നൽകുന്നത്.

എറിയാട് പഞ്ചായത്തിൽ നിർമ്മാണം പൂർത്തിയായ വീടിന്റെ താക്കോൽദാനം 11ന് ഉന്നത വിദ്യാഭ്യാസ മന്ത്രി ഡോ. ആർ. ബിന്ദു നിർവഹിക്കും. ജില്ലാ ഹയർ സെക്കൻഡറി നാഷണൽ സർവീസ് സ്‌കീമും ഗുണഭോക്താവായി കണ്ടെത്തിയ വിദ്യാർത്ഥി ഉൾപ്പെടുന്ന യൂണിറ്റും സംയുക്തമായി നടപ്പിലാക്കുന്ന പദ്ധതിയാണ് ' തണൽ സനേഹ ഭവനം'. ഈ വർഷം ജില്ലയിൽ മൂന്ന് സഹപാഠികൾക്കാണ് വീട് നിർമ്മിച്ച് നൽകുന്നത്. മറ്റ് രണ്ട് ഭവനങ്ങൾ വെള്ളാങ്ങല്ലൂരിലും മാളയിലുമാണ്. ഇവയുടെ നിർമ്മാണം അന്തിമഘട്ടത്തിലാണ്. ജില്ലയിലെ പതിനായിരത്തിലധികം വരുന്ന ഹയർ സെക്കൻഡറി എൻ.എസ്.എസ് വളണ്ടിയർമാർ നിരവധി ചലഞ്ചുകളിലൂടെയാണ് വീടുകൾക്കായുള്ള വിഭവ സമാഹരണം നടത്തിയത്. സ്‌ക്രാപ്പ്, ഫുഡ് ചലഞ്ചുകളിലൂടെ കണ്ടെത്തിയ തുകയാണ് ഭവന നിർമ്മാണത്തിന് ഉപയോഗിച്ചത്.