ഗുരുവായൂർ: ഏകാദശിയോടനുബന്ധിച്ച് ദേവസ്വം നടത്തുന്ന ഗജരാജൻ കേശവൻ അനുസ്മരണം ദശമി ദിനമായ തിങ്കളാഴ്ച നടക്കും. ഗജരാജൻ കേശവന്റെ ഛായാചിത്രം വഹിച്ചുകൊണ്ട് ദേവസ്വത്തിലെ 11 ഗജവീരൻമാരുടെ ഘോഷയാത്ര രാവിലെ 7 മണിക്ക് തിരുവെങ്കിടാചലപതി ക്ഷേത്രത്തിൽ നിന്ന് തുടങ്ങി പാർത്ഥസാരഥി ക്ഷേത്രം വഴി ഗുരുവായൂർ ക്ഷേത്രസന്നിധിയിൽ എത്തിച്ചേരും. തുടർന്ന് ക്ഷേത്രവും രുദ്രതീർത്ഥവും പ്രദക്ഷിണം ചെയ്ത് ശ്രീവത്സം അതിഥി മന്ദിരത്തിന് മുന്നിലുള്ള കേശവന്റെ പ്രതിമയ്ക്ക് മുന്നിലെത്തി പുഷ്പ ചക്രം സമർപ്പിക്കും. ആനത്തറവാട്ടിലെ തലയെടുപ്പുള്ള കൊമ്പൻ ഇന്ദ്രസെൻ കേശവന്റെ ഛായാചിത്രം വഹിക്കും. കൊമ്പൻ ബൽറാം ഗുരുവായൂരപ്പന്റെയും കൊമ്പൻ ഗോപികണ്ണൻ മഹാലക്ഷ്മിയുടെയും ചിത്രം വഹിക്കും. ഘോഷയാത്രയിൽ പങ്കെടുക്കുന്ന ആനകൾക്ക് സമൃദ്ധമായ ആനയൂട്ടും ദേവസ്വം ഒരുക്കും. ഗജരാജൻ കേശവൻ അനുസ്മരണ ചടങ്ങുകളെ തുടർന്ന് രാവിലെ 9 മണിക്ക് ചെമ്പൈ സംഗീതോത്‌സവ വേദിയിൽ പഞ്ചരത്‌ന കീർത്തനാലാപനവും നടക്കും.