ചാവക്കാട്: ഗുരുവായൂർ നിയോജക മണ്ഡലത്തിന് പുറത്തുള്ള സ്‌കൂളുകളിൽ പഠിക്കുകയും മണ്ഡലത്തിലെ താമസക്കാരുമായ എസ്.എസ്.എൽ.സി, പ്ലസ് ടു പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയ വിദ്യാർത്ഥികൾക്ക് എം.എൽ.എ പ്രതിഭാ പുരസ്‌കാരം വിതരണം ചെയ്തു. ചാവക്കാട് നഗരസഭാ കോൺഫറൻസ് ഹാളിൽ എൻ.കെ. അക്ബർ എംഎൽ.എ പുരസ്‌കാര സമർപ്പണം നിർവഹിച്ചു.
നഗരസഭാ ചെയർമാൻ കെ.കെ. മുബാറക്ക് അദ്ധ്യക്ഷനായി. നഗരസഭാ മുൻ ചെയർമാനും ഇപ്പോഴത്തെ കൗൺസിലറുമായ എം.ആർ. രാധാകൃഷ്ണൻ, കൗൺസിലർമാരായ കെ.വി. ഷാനവാസ്, രഞ്ജിത്ത്കുമാർ തുടങ്ങിയവർ സംസാരിച്ചു. ഇതോടെ മണ്ഡലത്തിലെ മുഴുവൻ കുട്ടികൾക്കുമുള്ള പ്രതിഭാ പുരസ്‌കാര വിതരണം പൂർത്തിയായി. നവംബർ 24ന് നിയോജക മണ്ഡലംതല ഉദ്ഘാടനം ഗുരുവായൂർ ടൗൺ ഹാളിൽ നിയമസഭ സ്പീക്കർ എം.ബി. രാജേഷ് നിർവഹിച്ചിരുന്നു.
തുടർന്ന് മമ്മിയൂർ എൽ.എഫ് സ്‌കൂൾ, അൽസാക്കി ഓഡിറ്റോറിയം അകലാട്, നാഷണൽ ഹയർ സെക്കൻഡറി സ്‌കൂൾ ഏങ്ങണ്ടിയൂർ എന്നിവിടങ്ങളിലായാണ് പുരസ്‌കാര വിതരണം നടന്നത്. ഈ വർഷം 1100 ലധികം വിദ്യാർത്ഥികൾക്കാണ് എം.എൽഎ പ്രതിഭ പുരസ്‌കാരം നൽകിയിട്ടുള്ളത്.