തൃശൂർ: ഡിജിറ്റൽ റീ സർവേ നടപടികൾ വേഗത്തിലാക്കാനും സ്മാർട്ട് വില്ലേജ് പദ്ധതിയുടെ ആദ്യഘട്ടം ഉടൻ പൂർത്തിയാക്കാനും റവന്യൂ മന്ത്രി അഡ്വ. കെ. രാജൻ കളക്ടർമാർക്ക് നിർദേശം നൽകി.

തൃശൂരിൽ രണ്ട് ദിവസമായി നടന്ന കളക്ടേഴ്‌സ് കോൺഫറൻസിലായിരുന്നു നിർദ്ദേശം. റവന്യൂ രംഗത്ത് നടപ്പിലാക്കാൻ ഉദ്ദേശിക്കുന്ന പ്രവർത്തനങ്ങൾ വേഗത്തിലാക്കാൻ വേണ്ട തീരുമാനങ്ങൾ സ്വീകരിക്കാനും സംശയങ്ങൾ ദുരീകരിക്കാനും സംഘടിപ്പിച്ച കോൺഫറൻസിന് റവന്യൂ അഡീഷണൽ ചീഫ് സെക്രട്ടറി ഡോ. എ. ജയതിലക്, ലാൻഡ് റവന്യൂ കമ്മിഷണർ കെ. ബിജു എന്നിവരും നേതൃത്വം നൽകി. സർക്കാരിന്റെ ശ്രദ്ധയിൽപ്പെടുത്തേണ്ട വിഷയങ്ങൾ കളക്ടർമാർ യോഗത്തിൽ ഉന്നയിച്ചു.
പട്ടയമേള തുടർന്നു കൊണ്ടുപോകാനുള്ള കണക്കുകൾ അടങ്ങിയ റിപ്പോർട്ട് യോഗത്തിൽ അവതരിപ്പിച്ചു. 2022ന്റെ തുടക്കത്തിൽ 200 വില്ലേജുകളിൽ ഒരേ സമയം റീ സർവേ നടത്താൻ പ്രത്യേക പദ്ധതി കളക്ടർമാരുടെ കോൺഫറൻസിൽ ചർച്ച ചെയ്തു. ഓരോ ജില്ലയിലും ഇതുമായി ബന്ധപ്പെട്ട് നടത്തേണ്ട ഒരുക്കങ്ങളും ചർച്ചയായി.

സംസ്ഥാനത്തെ എല്ലാ ഓഫീസുകളിലെയും റവന്യൂ രേഖകളുടെ ഡിജിറ്റലൈസേഷൻ അടിയന്തരമായി പൂർത്തിയാക്കണമെന്ന് റവന്യൂ അഡീഷ്ണൽ ചീഫ് സെക്രട്ടറി ഡോ എ ജയതിലക് കളക്ടർമാർക്ക് നിർദേശം നൽകി. 14 ജില്ലാ കലക്ടർമാരും റവന്യൂ സെക്രട്ടേറിയേറ്റ് അംഗങ്ങളും പങ്കെടുത്തു.