തൃശൂർ: കൂനൂർ ഹെലികോപ്ടർ അപകടത്തിൽ സൈനികർ മരിച്ച സംഭവം ഉമേഷിന്റെ മനസിനെ ഉലച്ചു. അപകടദിവസം വൈകിട്ട് സംയുക്ത സൈനിക മേധാവി ബിപിൻ റാവത്തിന്റെ ചിത്രം പ്‌ളാവിലയിൽ വരച്ച് ആദരാഞ്ജലി അർപ്പിച്ചപ്പോഴാണ് ഉമേഷ് സാധാരണ നിലയിലായത്. മനസിൽ തൊടുന്ന എന്തിനെയും ഇലച്ചിത്രമാക്കുന്ന പാലക്കാട് പത്തിരിപ്പാല പാണ്ടൻതറ ഉമേഷ് രണ്ടര മണിക്കൂർ കൊണ്ടാണ് ബിപിൻ റാവത്തിന്റെ ചിത്രം പൂർത്തിയാക്കിയത്.
മുറ്റത്ത് വീണ് കിടന്നിരുന്ന പഴുത്ത പ്‌ളാവിലയിലായിരുന്നു വര. ആലിലയിലാണ് കൂടുതലും വരച്ചിട്ടുള്ളത്. ശേഖരിച്ചവ തീർന്നതിനാൽ റാവത്തിന്റെ ചിത്രരചനയ്ക്ക് പ്‌ളാവില തെരഞ്ഞെടുക്കുകയായിരുന്നു. തുളസിയിലയിൽ കൃഷ്ണനെയും റോസാപ്പൂവിതളിൽ ഗണപതിയെയും ആലിലയിൽ മരയ്ക്കാർ സിനിമയുടെ പോസ്റ്ററും തൃശൂർ തെക്കെ ഗോപുരവും വരച്ചിട്ടുണ്ട്. കൊവിഡ് കാലത്ത് വർക്ക്‌ഷോപ്പിലെ മെക്കാനിക്ക് ജോലി ഇല്ലാതായപ്പോഴാണ് ഉമേഷ്, യു ട്യൂബ് നോക്കി ഇലച്ചിത്ര രചന (ലീഫ് ആർട്ട്) പരീക്ഷിച്ചത്. സ്‌കെച്ച് ചെയ്ത ശേഷം വരയില്ലാത്ത ഇലയുടെ ഭാഗങ്ങൾ ബ്‌ളേഡ് കൊണ്ട് മുറിച്ചു കളഞ്ഞ് അക്രലിക് കൊണ്ട് നിറം കൊടുക്കും. പ്രധാനമന്ത്രി നരേന്ദ്രമോദി, നടന്മാരായ മോഹൻലാൽ, കൃഷ്ണകുമാർ, സോപാന സംഗീതകാരൻ ഞെരളത്ത് ഹരിഗോവിന്ദൻ തുടങ്ങിയവരെയും മംഗലാംകുന്ന് കർണ്ണൻ, തെച്ചിക്കോട്ടുകാവ് രാമചന്ദ്രൻ എന്നീ ഗജ വീരന്മാരെയും ഇലകളിലൊതുക്കി.
കൂനൂർ അപകടം വല്ലാതെ വേദനിപ്പിച്ചു. സൈനികരോടുള്ള ആദരസൂചകമായി എനിക്ക് സമർപ്പിക്കാനുള്ളത് റാവത്ത് സാറിന്റെ ചിത്രമാണ്.
ഉമേഷ്
ഹോപ്പ് ഫെസ്റ്റ് ഉദ്ഘാടനം
തൃശൂർ : സംഗീതവും വാദ്യവും ചെറുനാടകങ്ങളും ഉൾപ്പെടുത്തി കേരള സംഗീത നാടക അക്കാഡമി സംഘടിപ്പിക്കുന്ന ഹോപ്പ് ഫെസ്റ്റിന്റെ ഔദ്യോഗിക ഉദ്ഘാടനവും ഇറ്റ്‌ഫോക്ക് ഫോട്ടോ പ്രദർശനോദ്ഘാടനവും 25 ന് വൈകീട്ട് 6.30 ന് അക്കാഡമി അങ്കണത്തിലെ മന്ത്രി കെ. രാജൻ നിർവഹിക്കും. 29 മുതൽ 31 വരെ സംഗീതവും വാദ്യവും ചെറുനാടകങ്ങളും ഉൾപ്പെടുത്തി അക്കാഡമി സംഘടിപ്പിക്കുന്ന ഹ്രസ്വ വർഷാന്ത്യ മേളയാണ് ഹോപ്പ് ഫെസ്റ്റ്. പി. ബാലചന്ദ്രൻ എം. എൽ .എ അദ്ധ്യക്ഷത വഹിക്കും. അക്കാഡമി വൈസ്‌ചെയർമാൻ സേവ്യർ പുൽപ്പാട്ട്, അക്കാഡമി സെക്രട്ടറി ഡോ. പ്രഭാകരൻ പഴശ്ശി എന്നിവർ പരിപാടിയിൽ സംബന്ധിക്കും. പ്രദർശനം ജനുവരി അഞ്ചിന് സമാപിക്കും.