തിരുവനന്തപുരം : പത്തനാപുരം ഗാന്ധിഭവന്റെ കീഴിൽ ജീവകാരുണ്യ സന്ദേശങ്ങൾക്ക് മുൻതൂക്കം നൽകി പ്രവർത്തിക്കുന്ന 'ഗാന്ധിഭവൻ ടി.വി 'യുടെ ആഭിമുഖ്യത്തിൽ സംസ്ഥാന ചലച്ചിത്ര അവാർഡുകൾ പ്രഖ്യാപിച്ചു. ഹരിഹരൻ(സംവിധായകൻ), ജയറാം(നടൻ),ഷീല(നടി),കെ.രവീന്ദ്രനാഥൻ നായർ, ജനറൽ പിക്‌​ചേഴ്‌​സ്(നിർമാതാവ്), ആർടിസ്റ്റ് നമ്പൂതിരി (കലാ സംവിധാനം) എന്നിവർക്ക് സമഗ്രസംഭാവനയ്ക്കുള്ള പുരസ്​കാരം സമ്മാനിക്കുമെന്ന് ജൂറി ചെയർമാനായ സംവിധായകൻ ഷാജി എൻ.കരുൺ അറിയിച്ചു. 25,000 രൂപയും ഫലകവും അടങ്ങുന്നതാണ് പുരസ്​കാരം.
മികച്ച സിനിമയായി സിദ്ധാർഥ് ശിവ സംവിധാനം ചെയ്ത 'എന്നിവർ' തിരഞ്ഞെടുക്കപ്പെട്ടു. 25,000 രൂപയും ഫലകവുമാണ് പുരസ്​കാരം. മികച്ച സംവിധായകനായി ജയരാജിനെയും മികച്ച നടനായി സുധീർ കരമനയേയും നടിയായി കനി കുസൃതിയേയും നവ്യാ നായരെയും തിരഞ്ഞെടുത്തു. 20,000 രൂപയും ഫലകവും പുരസ്​കാരമായി നൽകും.
മികച്ച ഛായാഗ്രാഹകൻ മധു നീലകണ്ഠൻ,​ തിരക്കഥാകൃത്ത് ശ്യാം പുഷ്​കരൻ,​ ഗാനരചയിതാവ് റഫീക്ക് അഹമ്മദ്,​ സംഗീത സംവിധായകൻ രമേശ് നാരായണൻ, ഗായകൻ നജീം അർഷാദ്, ഗായിക നഞ്ചിയമ്മ എന്നിവരാണ് മറ്റ് ജേതാക്കൾ. 15,000 രൂപയും ഫലകവുമാണ് സമ്മാനം. ജൂറി അംഗങ്ങളായ ആർ.ശരത്, വിജയകൃഷ്ണൻ,പല്ലിശ്ശേരി, പി.എസ്.അമൽരാജ് എന്നിവരും വാർത്താസമ്മേളനത്തിൽ പങ്കെടുത്തു.