തിരുവനന്തപുരം: കൗമുദി ടി.വിയിൽ ഡോ. പ്രവീൺ റാണ നയിക്കുന്ന ലൈഫ് ഡോക്ടർ എന്ന ജനപ്രിയ പരിപാടി 50 എപ്പിസോഡുകൾ പിന്നിടുന്നു. ഇന്ന് വൈകിട്ട് 7ന് ആക്കുളം ഓ ബൈ താമരയിൽ നടക്കുന്ന ആഘോഷപരിപാടികൾ മന്ത്രി ജി.ആർ. അനിൽ ഉദ്ഘാടനം ചെയ്യും. ലോകചരിത്രത്തിൽ ആദ്യമായി ജീവിതത്തിന് ഒരു ഡോക്ടർ എന്ന ആശയം കണ്ടെത്തിയ ഡോ. പ്രവീൺ റാണയുടെ വീക്ഷണങ്ങളാണ് ലൈഫ് ഡോക്ടറിന്റെ ഇതിവൃത്തം. യുവതലമുറയോടും ഉദ്യോഗസ്ഥരോടും രാഷ്ട്രീയ,​ സാമൂഹ്യ മേഖലയിലുള്ളവരോടും വികസന ആശയങ്ങൾ തുറന്നുപറഞ്ഞുകൊണ്ട് മുന്നേറുന്ന പ്രോഗ്രാം ഇതിനോടകം തന്നെ വമ്പിച്ച പ്രേക്ഷകശ്രദ്ധ നേടിക്കഴിഞ്ഞു. യൂ ട്യൂബിലും സോഷ്യൽ മീഡിയയിലും വൈറലായി മാറിയ നിരവധി ആശയങ്ങളടക്കം ഈ ലോകത്തിന് നൽകി ഡോ. പ്രവീൺ റാണ നിർമ്മിച്ച ചോരൻ എന്ന ചിത്രത്തിലെ പുതിയ ഗാനവും ചടങ്ങിൽ പ്രകാശനം ചെയ്യും. സംഗീത സംവിധായകനും ഗായകനുമായ ഇഷാൻ ദേവ്,​ അഖില ആനന്ദ് എന്നിവർ നയിക്കുന്ന ബാന്റ് ഷോയും ആഘോഷങ്ങൾക്ക് പകിട്ടേകും. ശരികൾ നിങ്ങളെ വിജയിപ്പിച്ചിരിക്കും,​ നഷ്ടങ്ങളെ കാപ്പിറ്റലാക്കി മാറ്റി വിജയം കൈക്കലാക്കാം,​ ഒരു നല്ല ആശയത്തിന് നിങ്ങളെ ഉയരങ്ങളിൽ എത്തിക്കാൻ ശക്തിയുണ്ട്,​ പണം അർഹതയുള്ളവരുടെ കൈയിൽ ഇരിക്കുമ്പോൾ അതിന് മൂല്യമുണ്ടാകും തുടങ്ങിയ അമ്പതോളം ആശയങ്ങൾ ഇതിനോടകം ലൈഫ് ഡോക്ടർ ലോകത്തിന് മുന്നിൽ സമർപ്പിച്ച് കഴിഞ്ഞു.