വക്കം: കേരളത്തിന്റെ സാമൂഹിക പുരോ​ഗതിക്കും സാംസ്കാരിക വളർച്ചയ്ക്കും വായനശാലകൾ കേന്ദ്രീകരിച്ചുനടന്ന ചർച്ചകൾ വലിയ പങ്കുവഹിച്ചതായി മന്ത്രി ഡോ. ആർ . ബിന്ദു . പുല്ലൂർമുക്ക് ദേശീയ വായനശാലയുടെ പ്ലാറ്റിനം ജൂബിലി ഉദ്ഘാടനം ചെയ്യുകയായിരുന്നു മന്ത്രി. ​ഗ്രന്ഥശാലകൾ സമത്വബോധത്തിന്റെ കൊളുത്തിവച്ച വിളക്കുകളായിരുന്നു.ഉച്ചനീചത്വത്തിൽ നിന്ന് കേരളത്തെ നയിച്ചതിലും ​ഗ്രന്ഥശാലകൾക്ക് വലിയപങ്കുണ്ടെന്ന് മന്ത്രി പറഞ്ഞു. ഒ .എസ് .അംബിക എം.എൽ.എ അദ്ധ്യക്ഷയായി. കേരള ബാങ്ക് ഡയറക്ടർ ബോർഡം​ഗം എസ് .ഷാജഹാൻ, ജില്ലാപഞ്ചായത്തം​ഗം വി .പ്രിയദർശിനി,താലൂക്ക് ലൈബ്രറി കൗൺസിൽ സെക്രട്ടറി ജി. എസ്. സുനിൽ,എസ് .ഉല്ലാസ് കുമാർ , നിസാ നിസാർ തുടങ്ങിയവർ സംസാരിച്ചു.ലൈബ്രറി സെക്രട്ടറി ഇ. ഷാജഹാൻ റിപ്പോർട്ട് അവതരിപ്പിച്ചു.​ഗ്ലോബൽ ബിസിനസ് എക്സലന്റ് അവാർഡ് ജേതാവ് സിനിമോൾ,​ഗ്രന്ഥശാല പ്രവർത്തകരായ ആർ.വിജയരാജൻ, ആർ .മണിരാജൻ, ഉബൈദ് കല്ലമ്പലം, എസ്. രവീന്ദ്രൻ, വി സജീവ് എന്നിവരെ ആദരിച്ചു. ലൈബ്രറി പ്രസിഡന്റ് കെ. സുധാകരൻ സ്വാ​ഗതവും എം .കെ. രാധാകൃഷ്ണൻ നന്ദിയും പറഞ്ഞു.