തിരുവനന്തപുരം: കെ-റെയിലുമായി ബന്ധപ്പെട്ട് പ്രതിപക്ഷം പറഞ്ഞകാര്യം ഹൈക്കോടതിയും ശരിവച്ച സാഹചര്യത്തിൽ പദ്ധതിയുമായി ബന്ധപ്പെട്ട് പ്രതിപക്ഷമുന്നയിച്ച ചോദ്യങ്ങൾക്ക് മറുപടി നൽകാൻ ഇനിയെങ്കിലും സർക്കാർ തയാറാകണമെന്ന് പ്രതിപക്ഷനേതാവ് വി.ഡി. സതീശൻ ഫേസ്ബുക് പോസ്റ്റിൽ ആവശ്യപ്പെട്ടു. പാരിസ്ഥിതിക സാമൂഹ്യ ആഘാതപഠനം നടത്താതെയും കേന്ദ്ര സർക്കാരിന്റെ അന്തിമാനുമതി ലഭിക്കാതെയും കെ-റെയിലിന് വേണ്ടി ഭൂമിയേറ്റെടുക്കാൻ സർക്കാർ കാട്ടുന്ന ധൃതി ദുരൂഹമാണെന്ന് പ്രതിപക്ഷം ചൂണ്ടിക്കാട്ടിയിരുന്നു. സർക്കാരിന് ഹൈക്കോടതിയും ഇപ്പോൾ താക്കീത് നൽകിയിരിക്കുകയാണ്. പദ്ധതിക്ക് വേണ്ടി ഏറ്റെടുക്കുന്ന സ്ഥലത്ത് കല്ലിടാനുള്ള അവകാശം സർക്കാരിനില്ലെന്നാണ് പ്രതിപക്ഷം പറഞ്ഞത്. ഇക്കാര്യം തന്നെയാണ് ഹൈക്കേടതിയും ഇപ്പോൾ ശരിവച്ചിരിക്കുന്നതെന്നും പ്രതിപക്ഷനേതാവ് ചൂണ്ടിക്കാട്ടി.